Kinuna ni Diputado ti Lone District ti Basilan Mujiv Hataman a panaglabsing iti Konstitusion ti pannakaitantan ti umuna a Parliamentary Election ti Bangsamoro Autonomous Region iti Muslim Mindanao (BARMM) manipud iti 2025 a maipan iti 2026.
Segun ken ni Hataman, deputy minority leader, insaaden ti Korte Suprema daytoy a pangngeddeng iti kaso a Kida vs. Senate of the Philippines idi 2011.
Maibatay iti daytoy a pangngeddeng , masapul nga aggiddan ti pannakaangay ti nailian ken ti lokal nga eleksion, ket ti laeng Barangay ken Sangguniang Kabataan Election ti saan a mairaman iti daytoy.
Innayon ni Hataman nga inkeddeng ti Korte Suprema a ti pannakaurnos ti eleksion ket maibatay iti Konstitusion a masapul a tungpalen ti Kongreso.
Kampania kontra pannakamanipular ti presio ti bagas, isayangkat ti DA
Adda naipila a gakat iti Kamara ken iti Senado a mangisingsingasing iti pannakaitantan ti BARMM election a maangay iti Mayo 11, 2026 a saan ket nga iti Mayo 12, 2025 gapu iti pangngeddeng ti Korte Suprema a nangilaksid iti Sulu kas kameng ti BARMM.
Kinuna ni Hataman a saan pay a pinal ti desision ti Korte Suprema maipanggep iti dayta isu a rumbeng laeng a matuloy ti eleksion inton 2025.
Kiniddaw ni Hataman kadagiti kakaduana iti Kamara nga amirisenda koma a naimbag ti naisingasing a pannakaitantan tapno masaluadan ti karbengan dagiti umili ti Bangsamoro nga agbotos. (Dexter Barro II/Manila Bulletin//Lito Hilidon/Bannawag)
