Saan a rumbeng a paikkaten ti mangiturturay a presidente babaen ti panangpapatay, panagrebelde, wenno panangpataud iti riribuk tapno laeng masublat ti kangatuan a saad iti pagilian.
Daytoy ti sungbat ti Malakanyang ita, Nobiembre 26, iti kinuna ni dati a presidente Rodrigo Duterte maibusor ken ni Presidente Marcos Jr. iti mapapati a panggepna a panangital-o iti anakna a ni Bise Presidente Sara Duterte iti kinapresidente.
Imbalakad ni Bersamin iti kampo ni Duterte nga "urayenda ti umno a tiempo, ken surotenda ti umisu a wagas."
Insennay ti opisial ti Malakanyang nga awanen ti ad-adda a managimbubukodan ngem iti panagkiddaw a maikkat ti agdama a presidente tapno laeng ti balasitang ni Duterte ti mangsublat iti timon.
Kampania kontra pannakamanipular ti presio ti bagas, isayangkat ti DA
Dinakamat ni Bersamin a nakaskasdaaw ta ti dati a presidente ti mangdurdurog kadagiti soldado nga isayangkatda ti kudeta maibusor ken ni Presidente Marcos Jr.
Kinuna ni Bersamin a rumbeng a raemen ni Duterte ti Konstitusion, ket liklikanna koma ti panagdardarasudosna, kas ar-aramidenna ita.
Impaganetget ni Besamin a saan a tallikudan ti agdama nga administrasion ti sinapataanna a pagrebbengan a mangituray ken mangimaton kadagiti Filipino kas maitunos iti Konstitusion ken Panagturay ti Linteg.
Iti maysa a press conference itay rabii ti Lunes (Nob. 25), kinuna ni dati a presidente Duterte a ti laeng militar ti makapalinteg iti "napilay a gobierno" ket impaganetgetna a ti militar ti mangsalaknib iti Konstitusion. (Betheena Unite/Manila Bulletin//Lito Hilidon/Bannawag)
