Indeklarar ti Korte Suprema a pinal ti pangngeddengna idi Septiembre 9, 2024 a saan a mairaman ti probinsia ti Sulu iti Bangsamoro Autonomous Region in Muslim Mindanao (BARMM) ta saan nga inanamongan dagiti umili ti Sulu ti pannakabukel ti BARMM Organic Law idi naisayangkat ti plebisito.
Kinuna ni panakangiwat ti Korte Suprema Camille Sue Mae L. Ting a kalpasan ti pangngeddeng ti Korte Suprema ita nga aldaw, Nobiembre 26, saan a napatgan ti motions for partial reconsideration nga indatag ti BARMM, ti Office of the Solicitor General (OSG), ken ti dadduma pay a partido.
Pinatalgedan ti Korte Suprema ti immuna a pangngeddengna a nainkalintegan ti Bangsamoro Organic Law ta dina pinagbalin ti BARMM a kas naisina nga estado iti Filipinas.
Nupay kasta, indeklarar ti Korte Suprema a saan a maitunos iti Konstitusion ti interpretasion iti probision ti linteg a mangiturturong kadagiti probinsia ken siudad ti ARMM nga agbotos kas maysa a geographical unit a pakairamanan dagiti probinsia a di immanamong iti linteg. Labsingen daytoy ti Artikulo X, Seksion 18 ti Konstitusion nga agkunkuna a dagiti laeng probinsia, siudad, ken heograpiko a lugar nga immanamong iti plebisito, ti mairaman iti autonomo a rehion.
Pannakaikkat ni VP Duterte a kas abogado gapu iti pangtana nga ibellengna ti bangkay daydi Presidente Marcos Sr. iti West Philippine Sea, naipila iti SC
Ket gapu ta saan nga inanamongan ti Sulu ti ratipikasion ti Bangsamoro Organic Law iti naaramid a plebisito, maysa a biddut ti pannakairaman daytoy iti BARMM.
Kinuna ni Ting a pinal ken rumbeng a maipatungpal a dagus ti pangngeddeng ti Korte Suprema.
Gapu iti saan a pannakairaman ti Sulu, buklen itan ti BARMM dagiti probinsia ti Basilan, Lanao del Sur, Maguindanao, ken Tawi-Tawi. (Rey G. Panaligan/Manila Bulletin//Lito Hilidon/Bannawag)
