Maluktan ti gundaway iti sangsangkamaysa a panagsanay ti militar, apaman a patalgedan ti Senado ken mapirmaan ti Reciprocal Access Agreement (RAA) ti Filipinas ken Japan.
Daytoy ti kinuna ni Sekretario ti Department of National Defense (DND) Gilbert Teodoro iti bista ti Senate Committee on Foreign Relations itay Lunes, Nobiembre 25, nga indauluan ni Senador Imee Marcos, mainaig iti tulag a mangpatibker iti panagtinnulong ti Armed Forces of the Philippines (AFP) ken ti Self-Defense Forces ti Japan.
Babaen daytoy a tulag, manamnama a maisayangkat ti naan-anay ken praktikal a panagtinnulong ken panagsanay ti militar ti Filipinas ken Japan. Paunegen ti RAA ti panagtinnulong iti depensa dagiti dua a pagilian.
Impaganetget ni Teodoro nga agbatay iti uppat a prinsipio ti RAA nga isu ti: Kinatalna ken Kinatalged iti Rehion ken Sangalubongan; Panangpabileg iti Kapasidad; Seguridad iti Taaw; ken Depensa iti Ruar.
Kampania kontra pannakamanipular ti presio ti bagas, isayangkat ti DA
Inyebkas ni Senate Majority Leader Francis Tolentino ti panangsuportarna iti RAA ti Filipinas ken Japan.
Kas maysa a mangilunglungalong iti pannakairaman iti adu a pagilian (multilateralism) iti panangbukel iti kappia iti rehion, kinatalged ken wayawaya iti panaglayag, ni Tolentino ti nangisurat ken nangsuportar iti Philippine Maritime Zones Act (RA 12064) ken iti Philippine Archipelagic Sea Lanes Act (RA 12065). (Dhel Nazario/Manila Bulletin//Lito Hilidon/Bannawag)
