Pinadayawan ni Bise Presidente ken Prime Minister ti United Arab Emirates (UAE) Sheikh Mohammed bin Rashid Al Maktoum ti komunidad dagiti Filipino gapu iti napateg a kontribusionda iti kagimongan ti Emirati.
Iti panagpatangda ken ni Presidente Ferdinand Marcos Jr. itay Nobiembre 26, inladawan ti Prime Minister ti kababalin dagiti Filipino a kas nadayaw ken nasingpet, banag nga apresiarenda unay.
Nagyaman met ni Presidente Marcos iti UAE iti panangawat ken panangpadagusda kadagiti Filipino, ket kinunana a ti nabara a panangpasangbayda kenkuana ti mangpauneg iti singgalut ti Filipinas ken UAE.
Kinuna ni Sheikh Mohammed nga adda 660,000 a Filipino nga agtrabtrabaho iti UAE ken nasurok a 500,000 a turista a Filipino ti tinawen a mapmapan iti pagilian.
Presidente Marcos, addan iti Filipinas
Sakbay a malpas ti panagpatangda, impasingked ni Presidente Marcos ti panagraem ken panagtinnulong a mangiladawan iti nabayagen a panagkadua ti Filipinas ken UAE, nangruna iti nainkalintegan a panangtrato ti UAE kadagiti mangmangged a Filipino.
Nabangon ti diplomatiko a relasion ti Filipinas ken UAE iti Agosto 19, 1974. Ti maysa-aldaw a panangsarungkar ni Presidente Marcos iti UAE ket mairana iti maika-50 nga anibersario ti panaggayyem ken panagtinnulong dagiti dua a pagilian. (Argyll Cyrus Geducos/Manila Bulletin//Lito Hilidon/Bannawag)
