Inanamongan ti Kamara ti Australia itay Nobiembre 26 ti gakat a mangiparit kadagiti ubbing nga awan pay 16 a tawenda nga agusar iti social media, ket mayawat iti Senado tapno mapasingkedan ti umuna a linteg iti lubong.
Sinuportaran dagiti 102 a diputado ti linteg a mangmulta iti TikTok, Facebook, Snapchat, Reddit, X (dati a Twitter), ken Instagram iti agingga iti AU$50 a milion no saanda a malapdan dagiti ubbing nga agusar iti account iti social media.
No maanamongan ti Senado ket agbalin a linteg iti daytoy a lawas, maikkan iti maysa a tawen dagiti social media platform a mangisayangkat iti wagas tapno maannurot ti maiparit nga edad sakbay a maipatungpal dagiti dusa.
Segun ken ni Dan Tehan, maysa kadagiti 13 a di immanamong iti gakat, immanamong ti gobierno nga adda dagiti mabaliwan iti Senado a mangsalaknib iti pribado nga impormasion. Maiparit kadagiti social media platform ti mangipilit nga alaenda dagiti government-issued nga ID dagiti mangusar iti social media. Maiparit met ti panagkiddaw iti digital identification iti government system.
Ceasefire ti Israel ken Hezbollah, naipatungpal; rinibu a Lebanese, agsublin kadagiti pagtaenganda
Karaman kadagiti pammabalaw dagiti simmupiat ti nadarasudos a pannakaanamong ti gakat iti Parlamento nga awan ti umdas a panangsukimat, saan nga agkurri, mangpatud iti peggad iti kinapribado dagiti agus-usar iti ania man nga edad, ken mangikkat iti autoridad dagiti nagannak a mangikeddeng no ania ti pagsayaatan dagiti annakda.
Kinuna ni Communications Minister Michelle Rowland a pagsasaritaan ti Senado ti gakat ita nga aldaw (Nob. 27), ket impasiguradona a maanamongan daytoy iti Senado.
Ngem iti biang ni Wayne Holdsworth, maysa nga ama a nabiktima ti 17 ti tawenna nga anakna a nagpakamatay gapu iti sextortion scam, kasapulan unay daytoy a gakat para iti kinatalged dagiti ubbing. (Associated Press/Manila Bulletin//Lito Hilidon/Bannawag)
