Babaen ti botos a 18-0-1, inanamongan ti Senado ti House Bill (HB) 10800 wenno ti P6.352 a trilion a 2025 General Appropriations Bill (GAB) iti maikatlo ken maudi a pannakaibasana itay Nobiembre 26.
Kinuna ni daulo ti Senate Finance Committee Senadora Grace Poe nga impangpangruna ti Senado ti pondo para kadagiti serbisio iti salun-at, edukasion, ken programa a pagbiagan dagiti Filipino.
Nanayonan ti pondo para kadagiti tulong medikal a maipaay kadagiti marigrigat a pasiente ken pannakapasayaat kadagiti ospital. Impangruna met ti Senado a pinonduan ti Free Higher Education Program kadagiti State Universities and Colleges (SUCs), agraman dagiti subsidia kadagiti estudiante a marigrigat.
Ni laeng Senate Minority Leader Aquilino "Koko" Pimentel III ti saan a nagbotos iti 2025 GAB.
Defense system nga agpannuray iti bukod a kabaelan, buklen ti Filipinas
Iti sabali a bangir, kinuna ni Poe a pagsasaritaandanto ti pondo ti Office of the Vice President (OVP) ken ti Ayuda sa Kapos ang Kita Program (AKAP) iti maangay bicameral conference committee (bicam) meeting ta masapul a yumanda daytoy kadagiti kakaduada iti Kamara.
Idi Oktubre, PhP1.3 a bilion ti inikkat ti Kamara iti pondo ti OVP iti bersionda iti 2025 GAB.
Inikkat met ni Senadora Imee Marcos ti PhP39.8 a bilion a pondo ti AKAP nga insingit ti Kamara iti 2025 GAB. (Dhel Nazario/Manila Bulletin//Lito Hilidon/Bannawag)
