Rinibu a Lebanese a nagbakwit gapu iti gubat ti Israel ken ti militante a Hezbollah ti nagsublin idi Mierkoles, Nob. 27, gapu iti pannakaipatungpal ti napagnamingan a ceasefire wenno panakaisardeng ti panaglalaban.
No agnayon, manamnama a gibusan ti ceasefire ti dandani 14 a bulan a panagdangdangadang ti Israel ken Hezbollah, a kimmaro idi katengngaan ti Septiembre ket nagbalin a naan-anay a gubat a napagam-amkan a mangpadegdeg met iti komprontasion ti Iran a mangsupsuportar iti Hezbollah, ken ti Estados Unidos a kadekketan a kaaliado ti Israel.
Iti pannakaisardeng ti rinnupak iti Lebanon, mabalin a lumukayen ti anges ti mapan a 1.2 a milion a Lebanese a nagtalaw kadagiti pagtaengan ken luglugarda gapu iti panaglalaban ken kadagiti pinullo a ribu nga Israeli a nagpapanaw met kadagiti pagtaenganda iti beddeng ti Lebanon ken Israel.
Ti tulag ti ceasefire nga inggunamgunam ti US ken France, ken inaprobaran ti Israel idi Martes, Nob. 26, ket mangipatungpal iti umuna a dua a bulan a pannakaisardeng ti panaglalaban ken mangituding iti Hezbollah a pumanaw dagiti armado a taona iti akin-abagatan a Lebanon ken iti isusubli met dagiti tropa nga Israeli iti sakupda iti beddeng.
Pannakaiparit kadagiti ubbing nga agusar iti social media, naipaulog iti Australia
Mai-deploy met iti abagatan ti rinibu a nayon a tropa a Lebanese ken U.N. peacekeepers ken maysa nga internasional a grupo nga idauluan ti US ti mang-monitor iti panangtungpal iti ceasefire dagiti maseknan.
Kinuna ti Israel nga addaanda iti karbengan a mangatakar iti Hezbollah no salungasingen daytoy dagiti kondision ti katulagan ti ceasefire.
Indeklarar met dagiti Lebanese a mangsupsuportar iti Hezbollah ti panagballigida iti laksid ti nasaknap a pannakadadael ti adu a paset ti Lebanon.
Mabalin met a dakamaten ti Israel ti dadakkel a balligina iti gubat, a pakairamanan ti pannakapapatay ti kangatuan a lider ti Hezbollah a ni Hassan Nasrallah agraman ddduma pay a nangangato a komanderna, kasta met ti pannakadadael ti adu nga impraestruktura dagiti militante.
Adu ti pukaw ti Hezbollah kadagiti nagun-odna iti pannakidangadangna iti Israel ngem kaskasdi a nabalinan latta ti militante a grupo a Shiite ti napinget a panakirupakna ket nalapdanna ti panagabante ti Israel kabayatan ti inaldaw a panagpabpabantona iti adu a rocket, missiles, ken drones iti ballasiw ti beddeng.
“Kanito daytoy ti balligi, panagpannakkel, ken dayaw para kadakami, a sekta ti Shiite, ken para iti entero a Lebanon,” kinuna ni Hussein Sweidan, maysa kadagiti residente a nagsubli iti Siudad ti Tyre.
Nupay kasta, adu met a Lebanese ti mangkritkritikar iti Hezbollah gapu iti panangiramraman daytoy iti Lebanon iti awan kaes-eskanna a gubat nga iturturong ti Iran.
“Konkontrolendakami (dagiti Hezbollah) ket awan ti maaramidanmi. Matay ti asino man a matay iti daytoy a gubat, sada ibagbaga a balligi daytoy," kinuna ti maysa nga agtutubo a lalaki a nagsubli manipud iti kabangibang a Syria kalpasan a napagtalaw iti dumaya a probinsia ti Bekaa. (Associated Press)
