Mabalinen nga idatag ti impeachment complaint kontra ken ni Bise Presidente (BP) Sara Duterte a mangkuestionar iti kabaelanna nga agakem a kas Bise Presidente, segun ken ni dati a Senador Antonio Trillanes IV itay Nobiembre 27.
Iti maysa nga interbiu, kinuna ni Trillanes a makitkita dagiti umili dagiti peggad ken pagilasinan a saan a maikari ni Duterte nga agakem kas Bise Presidente. Impakdaar ni Trillanes dagiti mabalin a pagtungpalan no ni Duterte ti agbalin a presidente, maipoon iti kababalin nga impakitana iti kallabes.
Idi Nobiembre 23, insawang ni Duterte a nangontrata isuna iti tao a mangpapatay ken ni President Ferdinand Marcos Jr., First Lady Liza Araneta-Marcos, ken House Speaker Martin Romualdez, no saan nga agballigi dagiti mangpapatay kenkuana.
Nupay addan naipila a kaso maibusor ken ni Duterte, ti pagakmanna kas Bise Presidente ti mangital-o kenkuana iti kinapresidente.
Kasasaad iti Indo-Pacific a rehion, pakaseknan ti sangalubongan
Kinuna ni Trillanes nga iti ania man nga oras ket mabalin latta nga agakem ni Duterte a kas presidente no adda mapasamak ken ni Presidente Marcos, ket impaganetgetna a masapul a maidatag ti impeachment kontra ken ni Duterte.
Innayon ni Trillanes a pagduaduaanna ti kinasimbeng ti panunot ni BP Duterte, isu a masapul a maikkaten daytoy. (Filane Mikee Cervantes/PNA//Lito Hilidon/Bannawag)
