Kabaelan latta a tungpalen ti Office of the Vice President (OVP) ti pagrebbenganna ken dagiti programana uray PhP733.198 a milion laeng ti naanamongan a pondona iti 2025 General Appropriations Bill (GAB) iti Kongreso, segun ken ni Senadora Grace Poe.
Inlawlawag ni Poe a daulo ti Senate Finance Committee a kabaelan latta ti OVP nga ipatungpal dagiti social program-na ta adda pay natda a PhP600 a milion para iti daytoy.
Dinakamat ni Poe ti indatag ti OVP a dokumento a nakailanadan ti singasing a badiet nga agdagup iti PhP600 a milion maipaay kadagiti programa a pangtulong kas iti medical assistance, burial assistance, ken Libreng Sakay.
Inlawlawag ni Poe a saan a ninayonan ti komite ti Senado ti singasing a badiet ti OVP ta awan met ti pormal a kiddaw daytoy a manayonan koma ti pondona.
Kampania kontra pannakamanipular ti presio ti bagas, isayangkat ti DA
Kinuna ni Poe a mabalin pay a mangidatag ti surat ti OVP nga agkiddaw a manayonan ti pondoda ket pagsasaritaandanto iti bicameral conference iti Kamara.
Aggatad iti PhP2.037 a bilion ti pondo a dawdawaten ti OVP iti 2025 National Expenditure Program, ngem inikkat ti Kamara ti PHP1.3 a bilion gapu ta ipatpatungpalen ti Department of Social Welfare and Development (DSWD) ken Department of Health (DOH) dagiti social program a singasing ti OVP. (Wilnard Bacelonia/PNA//Lito Hilidon/Bannawag)
