Masapul nga agtinnulong dagiti kameng ti Kamara ken Senado iti panangtamingda iti House Bill No. 10800 wenno iti 2025 General Appropriations Bill (GAB).
Daytoy ti impaganetget ni Senadora Grace Poe a daulo ti Senate Finance Committee iti pananglukatna iti bicameral (bicam) conference a maaangay iti Sheraton Manila Hotel iti Siudad ti Pasay itay Nob. 28, tapno mapagtutunos dagiti agsusupadi a probision iti singasing a PhP6.352 a trilion a nailian a badiet para iti 2025.
Mairaman kadagiti pagsasaritaanda ti 2025 GAB ti PhP733.18 a milion a singasing a badiet ti Office of the Vice President (OVP).
Maibatay iti 2025 National Expenditure Program (NEP), PhP2.037 a bilion ti dawdawaten ti OVP, ngem inikkat ti Kamara ti PhP1.3 a bilion ta ipatpatungpalen ti Department of Social Welfare and Development (DSWD) ken Department of Health (DOH) dagiti programa a dinakamat ti OVP.
Kampania kontra pannakamanipular ti presio ti bagas, isayangkat ti DA
Inanamongan ti Senado ti bersion ti Kamara, ngem kayat ti dadduma a senador a nayonan ti pondo ti OVP iti PhP150 a milion.
Mapagsasaritaan met iti bicam conference ti PhP39 a bilion a pondo para iti Ayuda Para sa Kapos ang Kita Program (AKAP) ti DSWD a tarigagayan ti Kamara nga isubli kalpasan nga inikkat daytoy dagiti senador.
Pinalagipan ni Poe dagiti kakaduana iti Kongreso nga iti laksid ti panagduduma ti kapanunotan ken ilunglungalongda, maymaysa ti panggepda nga agserbi kadagiti Filipino. (Wilnard Bacelonia/PNA//Lito Hilidon/Bannawag)
