Adda panggep ti Philippine National Police (PNP) a nayonan pay ti kaso a kriminal a naipila maibusor ken ni Bise Presidente (BP) Sara Duterte, dagiti kameng ti seguridadna ken dadduma pay nga empleado mainaig iti riribuk a pinataud ti pannakayakar ni abogado Zuleika Lopez iti ospital itay napan a bulan.
Kinuna ni panakangiwat ti PNP Brig. Gen. Jean Fajardo nga im-imbestigarenda pay dagiti mabalin a mainayon a kaso kontra ken ni Duterte, malaksid iti tallo a kaso a naidatagen itay napan a lawas.
Kinuna ni Fajardo a namnamaenda nga umadu ti kaso a maipila malaksid iti grave coercion, direct assault ken disobedience to persons in authority a naipila iti Quezon City Prosecutor’s Office.
Naakusaran ni Duterte ken dagiti kameng ti seguridadna iti pananglapped kadagiti polis a mangipatungpal iti pammilin ti Kamara iti pannakayospital ni Lopez a chief of staff ni Duterte. Maipan koma ni Lopez iti Veterans Memorial Medical Center (VMMC) ngem maipagarup a nakibiang ni Duterte isu a naipan daytoy iti St. Luke’s Hospital.
Kampania kontra pannakamanipular ti presio ti bagas, isayangkat ti DA
Saanen a nangted ni Fajardo iti dadduma pay a detalye ngem naibilinen kadagiti Criminal Investigation and Detection Group (CIDG) a kitaenda dagiti amin a panaglabsing ken panagpangta ti Bise Presidente maibusor ken ni President Marcos, First Lady Liza Araneta-Marcos ken House Speaker Martin Romualdez.
Inlawlawag ni daulo ti PNP Gen. Rommel Francisco Marbil a ti pannakipila iti kaso kontra ken ni Duterte ket panangtungpal iti pagrebbengan dagiti polis a mangitandudo iti panagturay ti linteg, ket saan a tapno riribukenda ni Duterte. (Aaron Recuenco/Manila Bulletin//Lito Hilidon/Bannawag)
