Impakaammo ti Commission on Audit (COA) a nakagasto ti Office of the Vice President (OVP) iti PhP375 a milion a confidential funds idi 2023.
Maibatay iti audit report ti COA para iti OVP idi 2023, aggatad iti nasurok a PhP125 a milion ti confidential fund a ginasto ti OVP idi 2022.
Segun iti COA, ti confidential fund ket mainaig kadagiti gastos para iti natalged a pannakaipatungpal dagiti nadumaduma a proyekto ken aktibidad iti babaen ti Good Governance Program/Socio-Economic Program delivery, ken ti pannakaisayangkat dagiti opisial a pannakipaset, ken ti opisial a panangibagi iti pagilian kadagiti internasional ken domestiko a pasamak, kas imbilin ti Presidente.
Kinuna ti COA a dagiti confidential expenses idi 2023 ket nairaman iti Maintenance and Other Expenses (MOOE) nga agdagup iti PhP1,980,047,155.04.
Kampania kontra pannakamanipular ti presio ti bagas, isayangkat ti DA
Ti 2023 MOOE ket ad-adu ngem iti 2022 MOOE ti OVP nga aggatad iti PhP724,131,015.28.
Iti sabali a bangir, kinuna ti COA a "nasayaat ken umno" ti pannakausar dagiti nailatang a pondo para iti Socio-Economic Program Delivery Program ti OVP.
Maibatay iti Quarterly Physical Report of Operation ti OVP manipud idi Disiembre 31, 2023, kuna ti COA a nangatngato ti nagapuanan ti OVP ngem kadagiti target a naibatay kadagiti output indicators, kaipapananna a naipatungpal ti OVP dagiti PAP (Programs, Activities and Projects), kas rinantana.
Adda PhP2,210,557,000 nga inlatang ti OVP para iti Socio-Economic Program Delivery ti ahensia para iti tawen 2023. Manipud iti dayta a gatad, natakuatan ti COA a PhP1,888.944,797.55 wenno 85.45 a porsiento ti nairuar.
Iti laksid daytoy, napaliiw ti COA dagit nadumaduma a pagkurangan iti pannakaiwaras dagiti welfare goods gapu kadagiti giwang iti agdama a pagannurotan ken proseso ken wagas a panangiwardas, a saan a naan-anay a naitunos iti Section 123 ken 124 ti Presidential Decree (PD) No. 1445. Ket kinuna ti COA a saan a masinunuo no umisu ken adda ti pannakaiwaras dagiti welfare goods.
Insingasing ti COA a papigsaen koma ti OVP ti panagiwarasna kadagiti welfare goods.
Ti panaggasto ti OVP iti confidential fund ti pagsasaritaan ken im-imbestigaren ti Quad Committee ti Kamara, gapu iti maatap a di umisu a panangbusbos. (Jeffrey Damicog/Manila Bulletin//Lito Hilidon/Bannawag)
