Iti umuna a gundaway iti pakasaritaan ti French Film Festival, nga ipapaay ti Embahada ti France iti Filipinas, iti pannakibinnulig ti SM Supermalls ken SM Cinema, maitampok ita a tawen, ti maika-27 a tawen daytoy, dagiti pelikula a peminista.
Napipintas dagitoy a pelikula a pinili pay dagiti mabigbigbig a filmmaker a French ken Filipino. Mairaman ditoy ti pelikula a Prodigieuses (Prodigies) a nangtaming iti pannakigasanggasat dagiti singin a piano prodigies a da Claire ken Jeanne ken ti amada a nagbalin a coach-da.
Makainspirar ken makapikapik met ti Marinette. Naibasar iti pakasaritaan ni football legend Marinette Pichon, natratar ditoy saan laeng a ti pannakidangadang ni Marinette iti ay-ayam a football no di pay ket ti panangirupirna kadagiti kalintegan dagiti babbai iti sports.
Mairaman kadagiti pelikula a maipabuya ti Mon Héroïne (My Heroine), maysa a comedy a pelikula ni Direktor Noémie Lefort a naibatay iti bukodna a padas kas maysa nga agtutubo a filmmaker; ken ti Une Histoire d’Amour et de Désir (A Tale of Love and Desire) a pakasaritaan ni ayat ken panangtakuat iti bukod a bagi.
LTO, inkarina nga addanton plaka dagiti amin a traysikel agingga iti Abril 30
Manglukat ti festival babaen ti maysa a roundtable discussion maipapan iti tema nga “Empowering Women through Cinema” (Panangpabileg Kadagiti Babbai Babaen ti Pelikula) babaen ken ni festival “godmother” Direktor Sigrid Bernardo, a maipabuya met ti mabigbigbig nga ababa a pelikulana a May at Nila iti SM Aura Cinema Director’s Club. Makaduana ditoy ti filmmaker ken propesor iti University of the Philippines (UP) a ni Sari Dalena, Direktor Sunshine Matutina, Raymond Red, ken Salome Kerrand. Agpaay met a moderator ti filmmaker ken historiador a ni Nick Deocampo.
