Impetteng ni Akbayan Rep. Perci Cendaña a rumbeng a maikkat ni Bise Presidente Sara Duterte iti puestona kalpasan nga inyendorsona ti impeachment complaint iti Kamara nga impila dagiti nadumaduma a lider ti civil society iti pagilian.
"Ita nga aldaw, pormal a yendorsok ti umuna nga impeachment complaint nga impila dagiti umilitayo kontra ken ni Bise Presidente Sara Duterte," kinuna ni Cendaña iti maysa a pakaammona idi kalman, Lunes, Disiembre 2.
“This moment marks a critical juncture in our nation's demand for accountability. I stand in full support of the brave citizens calling for Duterte to answer for her blatant violations of the Constitution, egregious corruption, and complicity in mass murder.”
Segun iti mammanday-linteg, ti maysa a bise president a maikari nga agserbi kadagiti umili a Filipino ket masapul nga "ethical, accountable” ken sikukumit iti serbisio publiko, saan a kas ken ni Sara Duterte.
Impeachment complaint kontra ken ni VP Sara Duterte, addan iti Senado
"Panawenen tapno malpasen ti batibat a pinaud ni Sara,” kinuna ni Cendaña.
Innayonna a rumbeng laeng a ma-impeach ni Bise Presidente Duterte gapu iti panangabusona iti turay ken panangsamsamna iti kaban ti pagilian.
“Daytoy panagreggettayo a panangsango ni Sara Duterte kadagiti nagbasolanna ket saan a maisina iti nalawlawa a kampania a panangsango met ti amana ken dagiti kakaduana kadagiti krimen nga inaramidda. Ti nadara a gubat ti rehimen ni Duterte kontra droga ti nangkettel iti pinullo ribu a biag, a nangibati iti tugot kadagiti agladladingit a pamilia a mangikalikagum iti hustisia, ken pannakaagas. Agtalinaed daytoy a batibat agingga a liklikan dagitoy a sungbatan dagiti nagbasolanda ken agingga a kumkumpet dagitoy iti turay,” kinuna pay ni Cendaña.
