Impaganetget ti Secretary General ti Kamara a ni Reginald Velasco itay Disembre 2 a maysa kadagiti kangrunaan nga annongen ti Kamara ti panangtaming iti impeachment complaint kontra ken ni Bise Presidente (BP) Sara Duterte.
Kalpasan ti panangawatna iti impeachment complaint idi kalman (Dis. 2), impaganetget ni Velasco a saan a bukod laeng a pangngeddeng ti Kamara, no di ket pagrebbengan nga intuding ti Konstitusion.
Kinuna ni Velasco a nalawag ti proseso nga intuding ti Konstitusion tapno masinunuo ti patas ken maibatay-linteg a pannakataming ti impeachment complaint.
Segun iti 1987 Konstitusion, mabalin nga ipila ti verified complaint ti impeachment ti asino man a kameng ti Kamara wenno ti asino man nga umili apaman a mayendorso daytoy ti asino man a kameng ti Kamara.
17 a Vlogger, nagkamang iti Korte Suprema
Inyendorso ni Diputado ti Akbayan Party-list Perci Cendaña ti impeachment complaint nga impila dagiti sibilian nga indauluan ni dati a senador Leila de Lima. Ngarud, mabalinen a tamingen ti Kamara ti reklamo kontra ken ni BP Duterte.
Insapata ni Velasco a tamingen ti Kamara ti impeachment complaint a maitunos iti inkeddeng ti linteg.
Segun ken ni Velasco, agtalinaed ti Kamara a sipupudno iti proseso a buyogen ti kinatarnaw, awan panangidumduma, ken panagraem iti panagturay ti linteg.
Innayon ni Velasco a daytoy a pagrebbengan ti maysa a kapatgan nga annongen ti Kamara tapno mapagtalinaed ti panagtalek ti publiko kadagiti institusion ti gobierno. (Ellson Quismorio/Manila Bulletin//Lito Hilidon/Bannawag)
