Imbutaktak ni Jamella Villanueva, ti saan a taga-showbiz a dati a girlfriend ni Anthony Jennings, ti maipagarup a panangliput da Anthony ken Maris Racal kenkuana, a nagtungpal iti panagsinada.
Iti Instagram Stories, nangipaskil ni Jamella kadagiti screenshot ti saritaan da Anthony ken Maris.
"Daytoy ti kinapudnok, ket ti panangibinglayko iti daytoy ti wagasko nga umaddang—awan kabuyogna a pungtot no di ket nabuyogan iti pigsa, namnama, ken pammati a nasaysayaatto dagiti aldaw a masanguanan," insurat ni Jamella.
Nabiit pay a pinasingkedan ni Anthony ti panagsinada ken Jamella, ngem saan a nangted iti detalye.
LTO, inkarina nga addanton plaka dagiti amin a traysikel agingga iti Abril 30
"Agyamanak ta iti kamaudiananna, pinili ni Anthony nga impalgak ti kinapudno gapu ta nabayag unayen a bagbagkatek a bukbukod daytoy a dadagsen," innayon ni Jamella.
Intuloyna: "Idi dumteng ni Maris, pudno a naragsakak para kadakayo a dua. Pinilik pay ti nangsuportar kadakayo iti laksid dagiti pagilasinan a diak inkankano. Rinaemko ti paglainganyo. Nagtalekak kadakayo a dua. Ngem ti panangliput a kas iti daytoy, nauneg ti pinarnuayna a sugat."
Idi Hulio, pinasingkedan ni Maris a nagsinadan ken singer-composer Rico Blanco.
Nangipaskil pay ni Jamella kadagiti ladawan a “nangderder iti pusok.”
“Inamadko pay ken ni Anthony ti maipapan iti daytoy, ngem inyaw-awanna ta kunana nga awan kaes-eskanna daytoy,” kinunana.
Iti sabali pay a paskil, kinuna ni Jamella a dina pulos impagarup nga agsinada ken Anthony kalpasan ti dandani pito a tawen a panagdennada.
"Diak pulos impagarup a masapul a palusposanka—ngem inaramidko—tapno tuman-ayka ken masarakam ti bukodmo a ragsak," insuratna.
Innayon ni Jamella: "Lineppasko dagiti bambanag iti wagas a natalna agingga iti kabaelak, ngem nasaktan ken nadismayaak—isu a naipaskil dagitoy iti TikTok."
Awan pay ti nakuna ni Maris maipapan iti daytoy a kontrobersia.
(Robert Requintina/Manila Bulletin)
