Indarirag ni Department of Agriculture (DA) Secretary Francisco Tiu Laurel Jr. ti pannakaipatungpal ti "kagudua-tasa nga innapuy" kas annuroten kadagiti restaurant, canteens, ken dadduma pay a panganan tapno makainut ti pagilian iti bagas.
Kinuna ni Laurel a ti agdama a kaadu ti masaysayang a bagas iti pagilian, mapakanna ti 2.8-milion a Filipino iti kada tawen.
Segun pay ken ni Laurel, iti datos ti manipud iti Philippine Rice Research Institute (PhilRice), bimmaba ti masayang a bagas iti pagtaengan iti 255,000 a tonelada metriko idi 2019, manipud iti 340,000 a tonelada metriko idi 2009.
Nupay kasta, maibasar iti survey nga insayangkat ti Food and Nutrition Research Institute manipud 2018-2019, masaysayang ti average a sangabalayan a Filipino ti 53 a gramo nga innapuy iti inaldaw, a katukad ti 6.4 a gramo a bagas iti kada tao.
Dua a suspek iti droga, nakemmeg iti Bacoor
Saan pay a nairaman iti nasao a survey dagiti saan a makmakan nga innapuy kadagiti restaurant ken dadduma pay nga establisimiento, a lalo a mamagngato iti dagup ti masaysayang a bagas.
Kinuna ni Laurel a kasapulan a sublian ti “‘half-cup rice’ proposal tapno maparegta ti ad-adda a responsable a panagkonsumo.”
Idi 2013, inyam-ammo ni Presidente Marcos, a senador idi, ti “half-cup rice” initiative babaen ti panangipilana iti bill a mangikalkaligagum iti panangidasar kadagiti babbabassit a serving tapno maksayan ti pannakasayang ti innapuy ken tapno mapagduduma dagiti pannangan.
Sinuportaran ni PhilRice Executive Director Dr. John de Leon ti pannakaisayangkat ti babbabassit a serving ti innapuy, a nagkunaanna a mabalin pay a tamingen daytoy dagiti pakaseknan iti salun-at.
“Ti panangidasar iti kagudua a tasa nga innapuy, kissayanna ti pannakasayang ti innapuy ken itandudona iti nasalsalun-at, mas balanse a taraon,” kinuna ni de leon.
Nainaig ti sobra a panagkonsumo iti innapuy ti umad-adu a panagraira ti diabetes iti Filipinas.
Idi 2021, maysa iti kada 14 a Filipino ti addaan iti diabetes, segun iti International Diabetes Federation.
Kinuna pay ni Laurel a panggep ti United Nations’ Sustainable Development Goals ti manggudua iti pannakadaddadael ti taraon iti sangalubongan inton 2030. Maitunos ti panangkissay iti pannakasayang ti bagas kadagitoy a panggep ken tapno mapalag-an ti pinansial a parikut iti panagangkat iti bagas ken iti gastos iti panangtaripato iti salun-at.
“Saan laeng a maipapan iti seguridad ti taraon daytoy no di ket maipapan pay iti kinatalged ken salun-at ti publiko,” innayon ni Laurel. (Jel Santos/Manila Bulletin)
