Mangipila manen ti Filipinas iti diplomatic protest maibusor iti China gapu iti pannangipaturongna iti water cannon ken panangdungparna iti bapor ti Filipinas iti baybay a sakupen ti pagilian. Daytoy nga inaramid ti China, binabalaw met dagiti dadduma a pagilian.
Segun ken ni Enrique Manalo, Sekretario ti Department of Foreign Affairs (DFA), idatag ti Filipinas ti protestana ita nga aldaw, Disiembre 5. Innayonna nga adda dagiti bapor ti Philippine Coast Guard (PCG) ken ti Bureau of Fisheries and Aquatic Resources (BFAR) iti baybay a sakupen ti Filipinas idi rinaut ida dagiti puersa ti China.
Kinuna ni Manalo a kasaritana ni Huang Xilian, Embahador ti China iti Manila, ita met laeng nga aldaw.
Kinuna ni Manalo a dida maawatan no apay nga itultuloy latta ti China ti ilegal nga aramidna.
Pannakapapatay babaen ti firing squad dagiti managkunniber nga opisial ti gobierno, indagadag ti maysa a diputado
Iti maysa a deklarasion ti China, kinunana a ti bapor ti Filipinas ti dimmungpar iti baporda ket rumbeng laeng a simmungbatda tapno makontrolda ti situasion.
Ngem adu a pagilian ti saan a mamati iti kinuna ti China, no di ket kinondenarda ti inaramid ti China.
Segun ken ni MaryKay Carlson, Embahador ti Estados Unidos iti Manila, ti inaramid ti China ket panangsinga iti operasion ti Filipinas iti baybay ken panamagpeggadna iti biag.
Maseknan met ti European Union (EU), ti Netherlands, New Zealand, Australia, ti United Kingdom, Sweden, Japan, France, Canada, Germany, ken Norway iti nasao nga inaramid ti China.
Ipagpaganetget dagitoy a pagilian ti panangraem iti internasional a linteg ken iti 2016 Arbitral Award iti South China Sea. (Joseph Pedrajas/Manila Bulletin//Lito Hilidon/Bannawag)
