Agarup PhP25 a milion ti balor dagiti ramit a pagtalon ti nayawat kadagiti kameng ti National Liberation Front (MNLF) idi Dis. 3 iti Mindanao State University-General Santos City a kas paset ti Transformation Program, segun iti Office of the Presidential Adviser on Peace, Reconciliation, and Unity (OPAPRU).
Nairaman kadagiti naipaay ti walo a traktor, innem a rice combine harvester, maysa a corn sheller, ken accessories ti makinaria.
Naibatay ti programa iti socio-economic provisions ti 1996 Final Peace Agreement ti gobierno ken MNLF.
Indagadag ni Sekretario ti OPAPRU Carlito Galvez Jr. kadagiti kaasmang ti MNLF a makipasetda iti nailian a gobierno para iti naan-anay a pannakaipatungpal ti Transformation Program.
Impeachment complaint kontra ken ni VP Sara Duterte, addan iti Senado
Panggep daytoy a programa a pasayaaten ti produksion ti agrikultura kadagiti masakupan a rehion a pakairamanan ti Maguindanao del Sur, Maguindanao del Norte, North Cotabato, Cotabato City Sultan Kudarat ken Sarangani. (Priam Nepomuceno/PNA//Lito Hilidon/Bannawag)
