BANGUI, ILOCOS NORTE -- Nagun-od ni Shanarelle Mae Aguinaldo Marcos, dati nga estudiante ti Bangui National High School iti daytoy nga ili ti maika-9 a puesto iti Philippine Nurse Licensure Exam a naangay idi Nobiembre 9 ken 10, 2024.
Nagturpos ni Shane (birngasna) iti College of Nursing ti Mariano Marcos State University, Siudad ti Batac.
Kinuna ni Shane a nupay a dina inarapaap ti agbalin a maysa kadagiti topnotcher, inkarigatanna nga inggaed ti nagbasa idi adda pay iti kolehio ken inggaedna met ti nagrepaso para iti board exam.
Idi masaludsod no ania ti maibalakadna kadagiti sumarsaruno a mangala iti board exam, kinunana: “Imposible a maikabesa amin nga inadal ngem ni Apo Dios ti agserbi a kired tapno agballigi. Masapul met nga agtalinaed a sipapakumbaba no kasapulan ti tulong ti sabali kadagiti di pay ammo wenno maawatan unay. Nasken met a makipulapol kadagiti padana nga ageksam nga addaan met laeng iti nasged a tarigagay ken mangaramid iti amin a kabaelanda tapno makapasa.”
US Marine, nalmes iti Ilocos Norte
Ni Shane ti inauna iti dua a bunga da Florante C. Marcos ken dati a Glenda Aguinaldo ti Brgy. Abaca itoy nga ili. (ABRAHAM C. AGUINO JR.)
