Impakdaar ti maysa a sukisok nga insayangkat dagiti geologist manipud iti University of the Philippines-Diliman (UPD) a ti in-inut a panagpababa ti lebel ti daga a gapuanan dagiti nadumaduma a banag a kas iti panagbalbaliw ti klima, nalabes a panagkunnot iti danum iti uneg ti daga, napartak nga urbanisasion, tectonic motion, ken ti natural a panagtipon dagiti sedimento ti agpangpangta a mangpunas saan laeng a kadagiti siudad iti Metro Manila iti mapa, no di ket pay dagiti kabangibangna a siudad.
Inusig da Jolly Joyce Sulapas, Audrei Anne Ybañez, ken Dr. Alfredo Mahar Francisco Lagmay ti Unibersidad ti Filipinas – Diliman College of Science (UPD-CS), agraman da Kayla Milcah Marasigan ken Julian Marie Bernice Grageda ti UP Resilience Institute Nationwide Operational Assessment of Hazards (UPRI-NOAH), ti land subsidence wenno ti in-inut a panagbaba ti lebel ti daga kadagiti dadakkel a siudad ti Filipinas manipud idi 2014 agingga idi 2020.
Ti sukisokda, a napauluan iti "Ground subsidence in major Philippine metropolitan cities from 2014 to 2020" a naipablaak iti International Journal of Applied Earth Observation and Geoinformation, impalgakna a ti Bulacan ket addaan iti kangatuan a sinking rate a 109 millimeters (mm) tunggal tawen.
Inadalda met ti land subsidence iti dadduma pay a siudad kas iti Metro Cebu (11 mm tunggal tawen), Metro Davao (38 mm tunggal tawen), Metro Iloilo (9mm tunggal tawen), ken iti Legazpi City (29 mm tunggal tawen).
Balikatan Exercise ti Filipinas, US, marugian ita nga aldaw
Kumaro pay ti pannakalned ti daga gapu iti panagngato ti baybay a gapu iti panagbalbaliw ti klima, a mangibungbunga iti masansan ken nakaro a layus nangruna no adda bagyo.
Natakuatan iti sukisok a kaaduan kadagiti lugar nga addaan iti kangatuan iti sinking rate ket masarakan kadagiti industrial ken komersial a paset, a nakaipatakderan dagiti pasdek.
Natakuatan met dagiti geologo a ti kasamayan a wagas a panglapped wenno panangikabassit iti land subsidence kadagitoy a komunidad ket ti napasayaat ken natalged a panagusar iti danum iti uneg ti daga ken dagiti nasayaat a wagas ti panangtarawidwid iti danum. (Patrick Garcia/Manila Bulletin//Lito Hilidon/Bannawag)
