Naalarma ni Mayor JB Bernos ti La Paz, Abra iti yaadu ti insidente ti pammaltog iti probinsia, ket kiniddawna kadagiti autoridad nga ipakatda koma ti naan-anay a wagas tapno maipasardeng dagiti kakastoy nga insidente.
Indagadag ni Bernos, nailian a presidente ti League of Municipalities of the Philippines, iti polisia a dida koma sumardeng iti panagimbestigarda kadagiti napaspasamak a pammaltog.
Kiniddaw daytoy ni Bernos kalpasan ti pannakapapatay ni Engineer Emmanuel "Nolie" B. Manglibo, 63, iti Barangay Calaba iti La Paz idi rabii ti Dis. 3.
Idi napan a bulan, natay ni Jomar Bigornia, 38, a napaltogan iti Barangay Naguirian, iti ili ti Pidigan.
US Marine, nalmes iti Ilocos Norte
Kinondenar ti Diocese of Bangued dagiti pammapatay ket nagkiddaw dagiti papadi kadagiti autoridad a pagtalinaedenda koma ti urnos ken talna iti probinsia. (Freddie Lazaro/Manila Bulletin//Lito Hilidon/Bannawag)
