SEOUL, South Korea - Pimmigsa ti posibilidad a ma-impeach wenno maikkat iti puesto ni Presidente ti South Korea Yoon Suk Yeol gapu iti yaanamong ti hepe ti agturturay a partido iti parliamento ti pagilian, itoy a Biernes, Nob. 6, iti pannakasuspende ti konstitusional a bileg ni Yoon.
Indeklarar ni Yoon itoy a lawas ti martial law iti pagilian, sana met la imbabawi idi sinabet ti nasaknap a protesta ti inaramidna.
Inkasa dagiti partido ti oposision ti parliamentario a panagbotos para iti impeachment ni Yoon inton Sabado, Nob. 7, a kunada a ti apagbiit a deklarasion iti martial law ket "saan a konstitusional, maysa nga ilegal a rebelion wenno coup." Nupay kasta, kasapulan ti oposision ti suporta manipud kadagiti miembro ti agturturay a partido tapno maanay ti 2/3 a mayoria a botos a masapul tapno maipasa ti impeachment motion.
Kabayatan ti miting ti partidona, impaganetget ti lider ti People Power Party a ni Han Dong-hun ti kasapulan a napartak a panangsuspende kadagiti pagrebbengan ken bileg ni Yoon kas presidente, ta segun kenkuana (Han), mangipangpangta iti “peggad dagiti nalabes nga aramid, kas iti panangpadas a panangipakat iti linteg militar, a mabalin a mangirubo iti Republika ti Korea ken dagiti umili iti dakkel a peggad.”
Trump, nasentensiaan iti pannakakonbiktarna iti <i>hush money case</i>
Kinuna ni Han a nakaawat isuna iti intelligence report a binilin ni Yoon ti komander ti defense counterintelligence ti pagilian a mangtiliw ken mangibalud kadagiti saan a nainaganan a kangrunaan a politiko a mapabpabasol nga addaan “anti-state activities” kabayatan ti martial law.
“Patiek a kasapulan ti madagdagus a pannakasuspende dagiti opisial nga aramid ni Presidente Yoon Suk Yeol tapno masalakniban ti Republika ti Korea ken dagiti umili,” kinuna ni Han.
Sakbayna, idi Huebes, Nob. 5, kinuna ni Han a lapdanna ti impeachment motion uray no binabalawna ti deklarasion ni Yoon iti martial law kas “saan a konstitusional.”
Ngem nagbaliw ti pamanunotan ni Han ket ita, suportarannan ti impeachment motion.
Tapno ma-impeach ni Yoon, kasapulan ti suporta manipud iti 200 kadagiti 300 a miembro ti parliamento. Addaan iti 192 a mammanday-linteg dagiti partido ti oposision a nagtitinnulong a nangikasa iti impeachment motion. Addaan met ti People Power Party ni Han iti 108 a miembro a mammanday-linteg.
No ma-impeach ni Yoon, masuspende agingga nga agdesision ti Constitutional Court no rebbengna a maikkat ni Yoon wenno maisubli ti bilegna kas presidente. Ni Prime Minister Han Duck-soo, ti maika-2 nga opisial ti pagilian, ti agakem kadagiti responsabilidad ti presidente no maikkat ni Yoon.
Kinuna ti kangrunaan a lider ti liberal nga oposision a Democratic Party a ni Lee Jae-myung a nasken a unay a masuspende ni Yoon iti “kabiitan a panawen.”
Kinuna ni Lee a ti martial law enforcement ni Yoon ket katukad ti “rebelion ken self-coup.” Kinunana a ti tignay ni Yoon, pakaigapuan ti mabalin a nakaro a pannakadadael ti imahe ti pagilian ken mangparalisado iti foreign policy."
Awan ti dagus a sungbat ni Yoon kadagiti komento ni Han. Saan pay a nagparang iti publiko sipud panangipakaammona iti telebision nga inwaksinan ti bilinna iti linteg militar. Ngem segun iti opisinana, inawat ni Yoon ti panaglusulos ni Defense Minister Kim Yong Hyun, a tudtuduen da Han ken ti oposision nga isu ti nangirekomendar iti panangyetnag iti martial law ken ni Yoon. (HYUNG-JIN KIM ken KIM TONG-HYUNG/Aassociated Press)
