Impakaammo ti Department of Education (DepEd) itay Huebes, Dis. 5, a sinarungkaran ni Sekretario ti DepEd Sonny Angara dagiti pagadalan nga inapektaran ti bagyo iti Camarines Sur tapno yawatna dagiti kasapulan nga alikamen iti panagadal, panagisuro ken digital.
Segun ken ni Angara, umuna pay laeng daytoy a panangsarungkar ti DepEd, ket manamnama ti ad-adu pay a panagtignayda kadagiti sumaruno nga al-aldaw, kas panangitultuloyda a mangitandudo iti dekalidad nga edukasion para iti tunggal ubing.
Kinuna ti DepEd a nabenepisiaran ti Gainza Central School kadagiti donasion ti UNICEF, a pakairamanan dagiti teaching kits, suplay dagiti estudiante, classroom materials, ken digital nga alikamen a mangsuportar iti pannakaisubli ti panagadal.
Naipayaan ti Bula Central School kadagiti learning packs ken whiteboard babaen ti Advancing Basic Education in the Philippines (ABC+) Project ti USAID.
BRP Gabriela Silang, nagsublin iti Filipinas
Nagyaman ni Angara iti panangsuportar ti UNICEF ken USAID kadagiti programa nga isaysayangkat ti DepEd.
Sinukimat ni Angara ti kasasaad ti Minalabac National High School a nakaro a nalayos idi panawen ti bagyo.
Iti Rodriguez National High School, sinarungkaran ni Angara ti digital classroom ti pagadalan nga addaan iti kompiuter ken internet, a pagsursuruan dagiti estudiante ti Senior High School nga agiprograma iti kompiuter.
Inauguraran ni Angara ti Academy of Inclusive Learning and Development (iLEAD), ti umuna a sentro ti pagsursuruan ken pagsanayan dagiti mannursuro iti Camarines Sur.
Da Diputado ti Camarines Sur 2nd District LRAY Villafuerte, Gob. Luigi Villafuerte, ken dadduma pay nga opisial ti DepEd iti Central ken Regional Office dagiti nangkuyog ken ni Angara iti isasarungkarna iti nasao a probinsia. (Merlina Hernando-Malipot/Manila Bulletin//Lito Hilidon/Bannawag)
