BAGUIO CITY— Impakaammo ti City Health Services Office-Reproductive Health and Wellness Center nga agingga iti Nobiembre, addaan ti siudad iti 211 a kompirmado a kaso ti Human Immunodeficiency Virus-Acquired Immuno-deficiency Syndrome (HIV-AIDS).
Kinuna ni Ghay Hope Alangsab, program co-manager ti CHSO HIV-AIDS, nga agtawen iti 20 agingga iti 29 dagiti pasiente.
Kinuna ni Alangsab a kasapulan a mapapigsa ti kampania kadagiti agtutubo gapu ta umub-ubing dagiti pasiente.
Kabayatan ti selebrasion ti World AIDS Day idi Dis. 4 nga addaan iti tema a “Take the Right Path,” binigbig ti CHSO dagiti partner ken suporterda gapu iti anep ken ganetgetda a mangitakder ken makitintinnulong iti pannakaipatungpal ti mandato ti ahensia a mangpasardeng iti epidemia ti HIV-AIDS agingga iti Tawen 2030.
US Marine, nalmes iti Ilocos Norte
Ginutigot ni Dr. Celia Flor Brillantes, City Health Officer, dagiti umili nga usarenda ti karbenganda. “Ti panangaywantayo iti salun-atda (dagiti pasiente nga addaan iti HIV-AIDS) ket naibatay iti karbengan. Saanmi a diskriminaren ti asino man ket dayta ti makagapu a napingetkami a manggutgutigot iti amin nga agpaeksamenda.”
Kinunana nga addaan karbengan ti tunggal maysa iti pannakataripato ti salun-atda ket mabalinda ti agpaeksamen ken agpaagas iti libre iti HIV-AIDS iti CHSO.
Binigbig pay ti CHSO ti Baguio City AIDS Watch Council, Bureau of Jail Management and Penology (BJMP), Anxiety and Depression Support Group, ken Baguio Association of Night Spots (BANS) gapu iti pingetda a mangidadaulo, mangitantandudo, ken agserserbida a kas kampeon iti pannakapukaw ti HIV-AIDS ditoy.
Idi 2023, inaramid ti CHSO ti umuna nga school-based HIV testing tapno maikkat ti negatibo ken saan a nasayaat a pammati mainaig iti daytoy a sakit ket nalaklaka a maammuan ken masapa a maagasan dagiti pasiente.
(Zaldy Comanda/Manila Bulletin)
