Gapu iti pannakayam-ammo ti ChatGenie, maysa nga AI-powered multi-agent framework, mapagam-amkan nga apektaran ti AI wenno artificial intelligence ti industria ti business process outsourcing (BPO) ti Filipinas gapu ta balbaliwan daytoy ti akem dagiti customer service agent wenno call center agents a mangipamaysa iti mas komplikado ken istratehiko nga obra.
Segun ken ni Ragde Falcis, chief executive officer ken co-founder ti ChatGenie, maysa a software company a nakabase iti Pasig, Metro Manila, agus-usar ti AI framework-da kadagiti advanced nga AI model a pakairamanan ti GPT-4o ti OpenAI ken ti Llama 3.1 ti Meta (kompania nga akinkukua iti Facebook), tapno ma-automate ti gagangay nga operasion ti serbisio iti kostumer kas kadagiti obra iti query identification, issue classification, message filtering, ken response refinement.
Daytoy a panagbalbaliw ket mamagbalin kadagiti BPO a mangadaptar ti hybrid a workforce model nga AI ti mangtaming iti dakkel a paset ti pannakilangen ti kostumer, tapno mawayaan dagiti tattao nga agent ket ti laengen nangruna a pakaseknanda ket dagiti mas komplikado nga isyu ken mangipamaysa iti pannakaparnuay kadagiti nadekdekket a relasion iti kostumer.
Kinuna ni Falcis a saan la a ti pannaka-automate ti iprosprosesoda ngem balbaliwanda pay ti masakbayan ti trabaho iti customer service.
Kampania kontra pannakamanipular ti presio ti bagas, isayangkat ti DA
“Saan ketdi a maipanggep iti pannakaawan ti trabaho daytoy," impaganetget ni Falcis. "Daytoy ket maipapan iti pannakaitandudo dagiti agent tapno agpokusda iti intelektual a kabaelanda--panangtaming kadagiti narikut a situasion a kasapulan ti kritikal a panagpanunot ken natawan (human) a pannakipagrikna. Iti kaytoy a wagas, tulonganmi dagiti negosio tapno nasamsamayda nga ag-operate kabayatan a maikkan met iti gundaway (dagiti tao a worker) a mapasayaatda dagiti karerada.”
Simmangbay daytoy a teknolohia ti AI iti umisu a gundaway para iti industria ti BPO iti Flipinas, a maysa a $38.7 bilion a sektor nga addaan nasurok a 1.3 a milion a Filipino a mangmangged. Gapu iti napartak a panagdur-as ti AI, adu a kompania ti mangbalbaliwen iti sistemada kadagiti hybrid (naglaok nga AI ken tao a workforce) a modelo.
Kinuna ni Falcis a panggep ti ChatGenie a mapasayaat dagitoy a panagbalbaliw babaen ti panangipaay iti awan sawirna nga integrasion ti AI kadagiti agdama a sistema ti panagtabaho.
Aklonen ketdi ti ChatGenie nga adda dumakdakkel a panagdadanag iti ikub ti BPO workforce maipapan iti seguridad ti trabaho gapu iti epekto ti AI.
Segun kadagiti naiwayat a panagsukisok, 46 a porsiento kadagiti BPO workers ti maseknan maipapan iti panagbalinen a redundant wenno panakaulit dagiti obrada iti sumaruno a lima a tawen, ken 29 a porsiento ti agamak a mabalin a nasapsapa pay a mapasamak daytoy.
Kadagitoy a pakaseknan, inlawlawag ni Falcis, a “ti multi-agent framework-mi ket mangsigurado a ti AI ken ti talento ti tao ket agtalinaed nga agkadua ken sangsangkamaysa iti wagas a mabenepisiaran ti tunggal maysa. Saanton nga agpatingga lattan dagiti ahente a tao kadagiti makauma nga akem ta pasayaaten pay ketdi ti AI dagiti kabaelan ken kabalilnanda (tao).”
Impaganetget ti ChatGenie ti panangikumitna a mangsuportar iti balanse a human-AI workforce. Siguraduen ti platform-da ti umno a suporta iti pagsasao para kadagiti Filipino, Ingles, ken lokal a pagsasao, a mangbigbig ti kinapateg ti natawan a pannakipagrikna iti panangipaay kadagiti personalisado a padas ti kostumer.
"Balbaliwan ti AI ti pannakitaripnong kadagiti kostumer babaen ti panangtamingna kadagiti gagangay nga aramid, ngem ti masakbayan ket maysa a partnership iti baeten dagiti tattao ken teknolohia,” kinuna pay ni Falcis. “Babaen ti panangyimplementar kadagiti AI agent, saanmi a sukatan dagiti tattao--pabilgenmi ida a mangipamaysa kadagiti mas addaan kaeskan ken komplikado a pannakilangen, a mangitag-ay iti entero nga industria ti BPO." (MANILA BULLETIN)
