Naikari a gasat wenno nairanrana, maysa nga umaayam iti naudi a grupo dagiti kampeon ti nangtarabay iti Mapua Cardinals tapno agsubli iti pantok ti basketbol para kadagiti lallaki iti National Collegiate Athletic Association (NCAA) iti Filipinas.
Ginibusan da Coach Randy Alcantara ken dagiti umaayamna ti 33-tawen a panagur-urayda, babaen ti panang-sweep-da iti College of St. Benilde Blazers iti serye ti tallo nga ay-ayam iti finals babaen ti panangatiwda iti Game 2 iti iskor a 94-82 iti Smart Araneta Coliseum idi Sabado, Disiembre1 7.
Nakaay-ayat ta ti naudi a panangyalat ti Cardinals iti kampeonato, paset ni Alcantara kas player iti team a nangyalat iti back-to-back a kampeonato iti babaen ni Coach Joel Banal.
Para ketdi ken ni Alcantara, saan laeng a gapu kenkuana ken dagiti players ti panagkampeonda. Insagutna ti kampeonato kadagiti napalpalabas a coach a nagserbi a paratignayna iti panangikagumaan ti grupona a maisubli ti tropeo iti sidong dagiti Cardinals.
Kampania kontra pannakamanipular ti presio ti bagas, isayangkat ti DA
Sakbay ni Alcantara, ti Cardinals ket tinarabay dagiti nasisiglat a coach a kas kada Horacio Lim, Atoy Co, Chito Victolero ken Leo Isaac.
Iti biang met ni Finals MVP Clint Escamis, nupay nasam-it ti panagkampeonda—a nakaitampokkan ti 12 nga ay-ayam a dirediretso a panangabakda agraman ti 9 nga ay-ayam a panang-sweep-da iti second round ti elimination—ta ginibusan daytoy ti dinekdekada a saanda a panangabak, nasamsam-it pay gapu ta nabugtakda ti al-alia ti nasakit a pannakaatiwda iti napalabas a season.
Maysa laengen a panangatiw ti masapul ti Cardinals tapno agkampeon iti napalabas a season, ngem inatiwda ida ti San Beda Red Lions iti namindua a daras iti finals.
Nasakit unay para ken ni Escamis daytoy a pannakaatiw ket isu ti inusarna a motibasion tapno magun-odda ti kalikagumda iti daytoy a gundaway.
Ket nagballigi.
Kuna ni Escamis, talaga a kayatna ti agkampeon iti daytoy a gundaway.
Ket natungpal met. (AST/Bannawag/Kristal Satumbaga-Villar/MB/Tempo)
