Pinirmaan ni Presidente Ferdinand Marcos Jr. iti Palasio ti Malakanyang ita nga aldaw, Disiembre 9, ti tallo a paglintegan a mangtaming kadagiti nadumaduma a kangrunaan a programa ti administrasion:
Ti Republic Act No. 12078 wenno Agricultural Tariffication Act a sinangal ni Sen. Cynthia Villar ti mangilatang iti PhP30 a bilion a badiet tapno mailayon ti Rice Competitiveness Enhancement Fund (RCEF) iti innem a tawen a mangsuportar kadagiti mannalon ken mangpatalged iti presio ti bagas babaen ti moderno a panagtalon.
Ti met Republic Act No. 12079 wenno VAT Refund for Non-Resident Tourists a sinangal ni Senador Sherwin Gatchalian ti mangipaay iti VAT refund system kadagiti saan a residente a turista tapno mapapigsa ti panaggastoda iti turismo ken masuportaran dagiti MSME.
Iti sabali a bangir, ti Republic Act No. 1208 wenno ti Basic Education Mental Health and Well-Being Promotion Act ipamaysana ti panangpasayaat iti salun-at ti isip kadagiti pagadalan babaen ti panangipasdek kadagiti akem ti counselor ken care center tapno maitandudo ti pagimbagan dagiti estudiante ket malapdan ti panagpakamatay. (Betheena Unite/Manila Bulletin//Lito Hilidon/Bannawag)
