Rumbeng a maibilang a prioridad a linteg iti babaen ti administrasion ni Marcos ti naisingasing a pannakabalbaliw ti 22 a tawenen a linteg mainaig iti ilegal a droga, segun ken ni diputado ti 2nd district ti Surigao del Norte Robert Ace Barbers, overall chairman ti Quad-committee (quad-comm) ti Kamara.
Impakaammo daytoy ni Barbers bayat ti panangisagsaganada iti partial committee report wenno progress report nga ipaanamongda iti plenario sakbay ti Christmas recess ti Kamara inton Disiembre 18.
Kinuna ni Barbers nga adda uppat a singasingda a maamendaran a paset ti RA No.9165 wenno ti Comprehensive Dangerous Drugs Act of 2002, ket maysa laeng daytoy kadagiti adu a linteg nga isingasingto iti Kamara kas bunga dagiti panagbista nga insayangkat ti Quad-comm. (Ellson Quismorio/Manila Bulletin//Lito Hilidon/Bannawag)
