Immanamong dagiti kameng ti bicameral (bicam) conference committee a maluktan iti publiko ti sumaruno a taripnongda tapno pagtutunosenda dagiti agsusupadi a probision ti singasing a PhP6.352 a trilion a General Appropriations Bill (GAB) para iti 2025.
Kinuna ni Senadora Grace Poe, daulo ti Senate Committee on Finance, a napagnunumuan ti daulo ti Senado ken Kamara a pagsasaritaanda iti publiko dagiti mabaliwan iti 2025 GAB tapno maipakaammo iti amin ti proseso ti badiet.
Kayatna a sawen, dagiti mammanday-linteg a kameng ti bicam ket mabalin nga agsaludsod ken pagsasaritaan dagiti pagsusupiatanda mainiag iti badiet, partikular dagiti kontrobersial a pondo para iti Ayuda sa Kapos ang Kita Program (AKAP) ken ti Office of the Vice President (OVP).
Sakbay daytoy, kiniddaw ni Sen. Imee Marcos kada Senate President Francis “Chiz” Escudero ken Poe a naan-anay koma ti kinalawag ken panagsasarita iti bicam conference iti nailian a badiet tapno maliklikan dagiti "last minute insertion ken di makaay-ayo a sorpresa."
Impeachment complaint kontra ken ni VP Sara Duterte, addan iti Senado
Pinagtalinaed ti Senado ti PhP733 a milion a badiet ti OVP kas impaulog ti bersion ti Kamara iti 2025 GAB.
Manamnama a tamingen ti bicam ti PhP39 a bilion a badiet ti AKAP nga inikkat met ti Senado iti bersionna iti 2025 GAB. (Hannah L. Torregoza/Manila Bulletin//Lito Hilidon/Bannawag)
