Nangabak ni Sofronio Vasquez ti Team Michael Buble iti nalatak a reality singing contest a “The Voice USA, Season 26.” Isu ti kaunaan a Filipino ken Asiano a nangabak iti nasao a pasalip.
"Agyamanak unay iti ayat, suporta, ken kararagyo. Agyamanak kadakayo amin," kinuna ni Sofronio babaen ti ababa a video itay nabiit.
Iti finale, naala ni Sofronio ti panagraem dagiti fans iti panangkantana iti "If I Can Dream" ni Elvis Presley ken iti "Unstoppable" ni Sia. Nagduetoda met ken Sting iti No. 1 hit a kanta nga "Every Breath You Take."
Ni Shye, 17, a kameng met laeng ti Team Buble, ti New York ti nangyalat iti maikadua a puesto.
LTO, inkarina nga addanton plaka dagiti amin a traysikel agingga iti Abril 30
Inabak ni Sofronio, 31, taga-Mindanao, dagiti dadduma pay a Top 5 finalists a da Danny Joseph (Team Reba McEntire), Jeremy Beloate (Team Snoop Dogg), ken Sydney Sterlace (Team Gwen Stefani) iti finale.
Malaksid iti titulo a “The Voice,” naipaayan pay ni Sofronio iti US$100,000 a premio ken record deal.
"Mabigbig ni Sofronio Vasquez gapu iti nabileg ken nalamuyot a timekna," segun iti website ti NBC.
Makita iti pakasaritaan ni Sofronio iti website ti NBC a dimmakkel iti Filipinas a dandani awan amin kenkuana agraman nasayaat a pagturogan.
Kadagitoy a panawen ti kinarigat ti biagda, nakasarak ni Sofronio iti ragsak babaen ti musika, a kunana a kanayon a mangted iti ragsak iti pamiliana.
Bigbigenna ti amana a nangimula iti panagayatna iti panagkanta, ken ibagana pay ketdi nga isu ti umuna a coach-na.
Ngem saan a ti musika ti umuna a karera ni Sofronio. Nangala iti kinadentista, ngem ti nakakalkaldaang a pannakapukaw ni tatangna ti nangiduron kenkuana a mangtunton iti arapaapna a makakanta iti entablado ti lubong.
Dayta ti nangitunda kenkuana iti adu nag-viral a kantana a cover song iti social media ken, kamaudiananna, iti entablado ti “The Voice.”
Idi 2019, ni Sofronio ti maikatlo iti “Tawag ng Tanghalan” iti programa nga "It's Showtime."
Ti nag-viral a cover-na a “That’s What Friends Are For,” nakagun-od iti nasurok a siam a milion a views iti Facebook (Facebook Link), ken ti cover-na a “ Nothing’s Gonna Change My Love for You” ket addaan iti nasurok a maysa a milion a views iti TikTok.
Idi 2020, inruar ni Sofronio ti umuna a single-na, ti "Bakit Hindi Ko Sinabi" iti babaen ti Old School Records (maysa a sub-label ti ABS-CBN Music). Idi 2022, inruarna met dagiti orihinal a kantana a “Bililhon” ken “Mahalaga” iti sidong ti Normal Use Records.
Iti umuna pay laeng a panagkantana iti “The Voice, Season 26,” impakitanan a dagus ti laingna iti panangkantana iti "I'm Going Down" ni Mary J. Blige ket pinagpusiposna a dagus dagiti tugaw dagiti hurado a da Snoop, Michael, Reba, ken Gwen. Banag nga inawagan ti NBC iti "Dazzling Voice Gets an Instant Four-Chair Turn."
Iti las-ud ti 24 nga oras, naaddaan daytoy iti dandani dua a milion a views iti Facebook, 600 ribu a views iti YouTube, ken 650 ribu a plays iti TikTok.
Ita, ibilangen ni Sofronio ti Utica, New York a kas pagtaenganna, ta isu a pagtrabahuanna kas dental assistant.
(Robert Requintina/Manila Bulletin)
