Binilin ni Presidente Ferdinand Marcos Jr. (PBBM) ti Philippine National Police (PNP) a mangted iti ad-adu pay a panagsanay iti anti-cybercrime para kadagiti polis tapno ad-adda a masalaknibanda dagiti netizen manipud kadagiti online scammer ken dadduma pay a cybercriminal.
Impaulog ni PBBM daytoy a pammilin iti naangay a command conference iti Camp Crame iti Siudad ti Quezon itay Huebes, Disiembre 12 a dinar-ayan dagiti nangangato nga opisial ti polis nga idauluan ni Gen. Rommel Francisco Marbil.
Nupay bumasbassit ti bilang ti kaso ti cybercrime a mairepreport iti PNP kadagiti napalabas a bulan, kinuna ni Marbil a masapul latta a mapatangken ti ngipen ti kampania kontra kadagiti kriminal babaen dagiti kasapulan nga alikamen ken pannakasanay dagiti polis.
Ti Anti-Cybercrime Group ti PNP ti natudingan a mangsaranget kadagiti cybercriminal.
Kampania kontra pannakamanipular ti presio ti bagas, isayangkat ti DA
Iti kallabes, inkari ni Marbil ti panangilungalongna iti 5-year development plan a mangipamaysa iti panagsukimat ken panagusar iti baro a teknolohia iti pannakaipatungpal ti linteg, agraman ti artifical intelligence. (Aaron Recuenco/Manila Bulletin//Lito Hilidon/Bannawag)
