Maysa a baro a taga-Kapangan, Benguet ti nakaipaayan ti kangatuan a pammadayaw iti Officer Candidate Course (OCC) ti Armed Forces of the Philippines (AFP) iti daytoy a tawen, ni Mhel Lucas Empiso. Inabakna dagiti 608 a kakaduana a nagsanay a naggapu iti nadumaduma a paset ti pagilian.
Kinuna ni Probationary 2nd Lieutenant Mhel Lucas Empiso bayat ti joint graduation ceremony ti Major Services Officer Candidate Course (MS OCC) sadiay Camp Aguinaldo, Quezon City idi Biernes, Disiembre 13, a saan nga isuna ti kasisiriban wenno kapigsaan iti klasena ngem ti dedikasion ken kinapingetna ti nanggun-od kenkuana iti kangatuan a pammadayaw.
“Kayatko nga ipaganetget a ti kinapinget ken kinapasnek, mabalin nga abakenna ti talento. No lagipenmi ti panagsanaymi, dandani pinasukonakami dagiti karit, ngem timmakderkami ken inlabanmi dagiti arapaapmi,” kinunana iti valedictory address-na a sinaksian da Presidente Bongbong Marcos Jr., Department of National Defense (DND) Sec. Gilberto Teodoro Jr., ken Hepe ti AFP Gen. Romeo Brawner Jr.
Ti OCC ket maysa a tawen a nainget a panagsanay para kadagiti amin a kualipikado a baccalaureate degree holder nga agtarigagay nga agserbi kas commissioned officer ti AFP. Maikkan dagiti nagturpos iti OCC iti ranggo a second lieutenant wenno ensign apaman a sumrekda iti regular force ti AFP.
LTO, inkarina nga addanton plaka dagiti amin a traysikel agingga iti Abril 30
Buklen ti 609 dagiti nagturpos ita a tawen: 361 a kadete manipud iti Philippine Army (PA) “Katarakian” Class 61-2024; 173 a kadete manipud iti Philippine Air Force (PAF) “Sigmandigan” Class 2024; ken 75 a kadete manipud iti Philippine Navy (PN) “Mangisalakan” Class 42-2024.
Kinablaawan ni Brawner dagiti nagturpos, dagiti nagannak kadakuada ken dagiti pamiliada, ken kinunana a nakasaganan dagiti nagturpos nga agbalin a masanguanan a lider ti AFP.
“Daytoy ket maysa a naisangsangayan nga okasion ta selebrarantayo saan laeng a ti panagpatingga, no di ket ti panangrugi, dagiti napateg nga akemyo iti Armed Forces of the Philippines,” kinuna ti hepe ti AFP.
Inyawat ti Presidente dagiti pammadayaw kadagiti top four manipud iti Army, Air Force, ken Navy Officer Candidate School (OCS) ken dagiti diploma iti class president ti tunggal klase.
Kas nakagun-od iti kangatuan a pammadayaw, inawat ni Empiso ti Presidential Sabre Award ken P1 milion manipud kadagiti financial institutions ti AFP, segun ken ni Col. Harold Cabunoc, commandant ti Philippine Army Officer Candidate School (PAOCS).
Dagiti dadduma pay a napadayawan:
Philippine Army OCC "Katarakian" Class 61-2024)—P2Lt. Arman A. Canono ti Siudad ti Kidapawan, Cotabato, Secretary of National Defense Sabre awardee; P2Lt. Jeselle G. Morilla ti Kapatagan, Lanao del Norte, Chief of Staff AFP Sabre awardee; ken P2Lt. Jhon Mark M. Amianes ti Matalam, North Cotabato, Commanding General, Philippine Army Saber awardee;
Philippine Navy OCC “Mangisalakan” Class 42-2024— P/Ens. Earl Manuel F. Bendo ti General Emilio Aguinaldo, Cavite, Presidential Saber awardee; P/Ens. Lord Jansen D. Tavares ti Sto. Tomas, La Union, Secretary Of National Defense Saber awardee; P/Ens. Mark Ely M. Sernal ti San Ramon, Bula, Camarines Sur, Chief Of Staff AFP Saber awardee; P2Lt. Jaynard D. Alvarez ti Pagadian City, Zamboanga del Sur, Flag Officer In Command, Philippine Navy Saber awardee;
Philippine Air Force OCC “Sigmandigan” Class 2024— P2Lt. Phinam Jethro S. Garcia ti Pulang Lupa 2, Las Piñas City, Presidential Saber awardee; P2Lt. Sheinna F. Domingo ti Western Bicutan, Taguig City, Secretary Of National Defense Saber awardee; P2Lt. Shan Ryck L. Largo ti Rosario, Northern Samar, Chief Of Staff AFP Saber awardee; ken P2Lt. Paula Q. Guillermo ti Bulihan, Silang, Cavite, Commanding General, Philippine Air Force Saber awardee.
(Martin Sadongdong)
