Pinabaro ni Presidente Ferdinand Marcos Jr. (PBBM) ti karina a mangpamoderno iti Armed Forces of the Philippines (AFP), a mangrugi iti panagpuonan kadagiti talento, espesialista, ken daulo a mamagsilpo iti tradision ken panagbalbaliw.
Daytoy ti kinuna ni PBBM iti panangidaulona iti seremonia ti panagturpos dagiti nakipaset iti Major Services Officer Candidate Course (MS OCC) iti Camp Aguinaldo iti Siudad ti Quezon ita nga aldaw, Disiembre 13.
Kinuna ni PBBM nga ipasdek ti administrasionna ti AFP a pakakitaan iti pigsa, panagkakadua, kinatibker, ken kinalaing iti teknolohia.
Imbalakad ni PBBM kadagiti nagturpos a tungpalenda koma ti sinapataanda a pagrebbengan, ket agserbida a buyogen ti kinalaing, kinapudno, ken kinadayaw sadino man ti pakaituronganda.
Kampania kontra pannakamanipular ti presio ti bagas, isayangkat ti DA
Ti MS OCC ket maysa a tawen a programa pada kadagiti degree-holder a madutokan a kas opisial ti Philippine Army (PA) ken Philippine Air Forces kas Second lieutenant.
Ita tawen, 610 ti nagturpos iti nasao a programa, a pakabuklan ti 362 a kadete manipud iti PA - Katarakian Class 61-2024, 173 a kadete manipud iti Philippine Air Force (PAF) - Sigmandigan Class 2024, ken 75 a kadete manipud iti Philippine Navy PN - Mangisalakan Class 42-2024.
Nairaman iti programa ti kangrunaan a panagsanay iti militar, pannakasanay iti opisial, pannakigubat, ken dagiti tay-ak ti espesialisasion a maitunos iti bukodda a sangay ti serbisio. (Argyll Cyrus Geducos/Manila Bulletin//Lito Hilidon/Bannawag)
