Impasigurado ti Department of Health (DOH), ti ahensia a mangimatmaton iti Philippine Health Insurance Corporation (PhilHealth), itay Disiembre 13 nga agtultuloy latta a maited dagiti benepisio iti PhilHealth "adda man wenno awan" ti pondo manipud iti umay a General Appropriations Act (GAA).
Daytoy ti kinuna ti DOH kas sungbatda iti pangngeddeng ti Senado a di panangted iti PhilHealth iti pondo para iti 2025.
Kinuna ti PhilHealth nga adda latta maala nga inpatient, outpatient, ken special benefit package.
Segun ken ni Sekretario ti DOH ken daulo ti PhilHealth Board Teodoro J. Herbosa, a kalpasan ti panangrepasoda iti financial statement ti PhilHealth, patien ti DOH nga adda umdas a pondo ti PhilHealth tapno agtultuloy a mangted ken mangpasayaat pay iti serbisioda. (Ellalyn De Vera-Ruiz/Manila Bulletin//Lito Hilidon/Bannawag)
