"Extravagant," dayta ti kinuna ni Cagayan de Oro City 2nd district Rep. Rufus Rodriguez iti PhP138-milion nga inlatang ti Philippine Health Insurance Corporation (PhilHealth) a magastos para iti selebrasion ti anibersario daytoy inton Pebrero 2025.
Binalakadan ni Rodriguez ti PhilHealth nga ibabbaba koma daytoy ti gastosenna.
“Ipangag koma dagiti ahensia ti gobierno a kas iti PhilHealth ti kiddaw ni Presidente Ferdinand Marcos Jr. para iti panagin-inut saan laeng a kabayatan ti Christmas holidays ngem uray kadagiti sumarsaruno a bulan, kas pannakimaymaysa kadagiti pamilia a Filipino iti adu a komunidad nga agsagsagaba ken agrekrekober pay laeng iti pannakadidigrada manipud kadagiti kallabes a super bagyo, kasta metten kadagiti nakurapay a Filipino,” kinunana ni Rodriguez iti maysa nga statement idi Dis. 15.
Para ken ni Rodriguez, panagsaysayang laeng ti nasao a plano a selebrasion ti anibersario ta ti kaaduan a gastos ket para kadagiti giveaways a kas iti token, coffeetable books, ken disposable items.
Impeachment complaint kontra ken ni VP Sara Duterte, addan iti Senado
“Nasaysayaat koma a mausar ti PhP138-milion para iti patient dialysis," kinuna pay ni Rodriguez. "Iti naipangato a rate ti panag-dialysis a PhP6,350 kada session, kabalinan ti PhP138-milion a ponduan ti 21,732 a dialysis treatments."
Innayonna nga ad-adda nga apresiaren dagiti miembro ti PhilHealth ti panangbusbosda iti dakkel a gatad para iti pagimbaganda imbes a giveaways.
"An-anuen dagiti miembro ti coffeetable book wenno token? Ti ad-adda a kasapulanda ket ti subsidy para iti dialysis, agas, ken pannakayospital," impaganetget ni Rodriguez.
Inakusaran pay ni Rodriguez dagiti opisial ti PhilHealth a “mentally dishonest” gapu iti panangibagada a "fake news" ti panangipalgak ni Dr. Tony Leachon maipapan iti PhP138-milion.
“Saan a peke a damag dayta. Nagbiddut laeng ni Dr. Leachon a nangibaga a ti gatad ket para iti Christmas party ngem idi agangay inaturna met laeng a para dayta iti selebrasion ti anibersario. Ngem husto ti imbagana maipapan iti spending plan, nga inamin a mismo dagiti opisial ti PHilhealth. Nagpapalusot lang sila by claiming it was fake news,” kinunana. (Ellson Quismorio/MB)
