Bassit laeng a kantidad ti kasapulan tapno maponduan ti PhP2,000 a ngimmatuan ti Service Recognition Incentive (SRI) a maipaay kadagiti 1,011,800 a mannursuro iti para iti publiko a pagadalan iti entero a pagilian, agraman ti non-teaching staff dagitoy.
Daytoy ti kinuna ni Diputado ti Makati City 2nd district Luis Campos Jr. iti direktiba ni Presidente Ferdinand Marcos Jr. a maingato ti SRI manipud iti PhP18,000 agingga iti PhP20,000.
Pattapattaen ni Campos a PhP2 a bilion laeng ti kasapulan a pondo tapno maponduan ti ingangato ti SRI dagiti empleado ti Department of Education (DepEd), babaen ti nailatang a badiet daytoy iti 2025 General Appropriations Bill (GAB), agraman ti Miscellaneous Personnel Benefits Fund (MPBF).
Segun ken ni Campos, ti MPBF, a maysa a lumpsum iti badiet, ket mabalin nga usaren tapno maponduan dagiti pagkurangan ti sueldo, bonus, allowance, ken dadduma pay a benepisio dagiti empleado ti gobierno.
Impeachment complaint kontra ken ni VP Sara Duterte, addan iti Senado
Kinuna ni Campos a PhP29.7 a bilion ti nailatang a pondo ti MPBF iti 2024 a badiet ken PhP163.3 a bilion pay iti 2025 GAB a pirmaan ti Presidente inton Disiembre 20.
Ni Campos ti autor ti House Bill (HB) No. 7840 a nangingato iti World Teacher’s Day Incentive Benefit iti PhP3,000 kas pammadayaw kadagiti mannursuro.
Kinuna met ni Sekretaria ti Department of Budget and Management (DBM) Amenah Pangandaman a buklenda ti pannakailatang ti pondo tapno mairuaren ti kuarta a maipaay iti SRI dagiti empleado ti DepEd. (Ellson Quismorio/Manila Bulletin//Lito Hilidon/Bannawag)
