Inkeddeng ti Korte Suprema (SC) iti desisionna a rimmuar ita nga aldaw, Disiembre 16, nga ilegal ti panangsuspenso ti Bohol Wisdom School (BWS), iti maestra (di ninaganan ti MB) a nasikogan ti nobiona.
Idi 2016, nagisuro ti maestra iti BWS, a maysa a Christian school. Idi dua bulanen a masikog ti maestra, impakaammona daytoy iti daulo ti BWS, ket naipaulog ti verbal suspension ti maestra aginggana't agkasarda iti nobiona nga ama ti sikogna.
Kalpasan ti lima nga aldaw, nakaawat ti maestra iti surat a notice of indefinite suspension kenkuana gapu iti imoralidad, ta nagsikog daytoy a dipay inkasar ti nobiona.
Nagipila ti maestra iti reklamo nga illegal suspension. Inkeddeng ti Labor Arbiter a "constructively dismissed" ti maestra, ngem binalusingsing daytoy ti National Labor Relations Commission (NLRC).
Impeachment complaint kontra ken ni VP Sara Duterte, addan iti Senado
Inkeddeng ti Court of Appeals (CA) nga awan ti constructive dismissal, ket natakuatanna nga ilegal ti pannakasuspenso ti maestra.
Inkamang ti BWS ti kaso iti SC.
Iti pangngeddeng ti SC, pinatalgedanna ti desision ti CA, ket kinunana a saan a maibilang nga imoral ti seksual a relasion ti dua a di nagkasar a nataengan a siaanamong nga agdenna.
Segun iti SC, awan ti linteg a mangiparit iti dayta, ket saan a manglabsing iti kangrunaan a polisia ti estado a nailanad iti Konstitusion.
Inlawlawag ti SC a segun iti linteg, ti estandarte ti moralidad a maipakat iti amin ket maipaay iti publiko ken sekular, saan a narelihiosuan.
Kinuna ti SC a no relihioso a pammati ti pagbatayan dagiti paglintegan ken moralidad, maipaalagad iti tunggal maysa a sumurot iti maysa a narelihiosuan a programa wenno panggep.
Imbilin ti SC iti BWS a bayadanda ti sueldo ti maestra manipud Sept. 22, 2016 agingga iti Okt. 7, 2016 ken ti 13th month pay agingga iti Nob. 9, 2016. Nairaman pay a bayadan ti eskuela ti rice allowance, laundry allowance, midyear bonus, vacation/sick leave ti maestra agingga iti Nob. 2016, ken 10 a porsiento ti attorney's fees.
Nabilin pay ti BWS nga ikkanda ti maestra iti Certificate of Employment. (Rey G. Panaligan/Manila Bulletin//Lito Hilidon/Bannawag)
