No ni Sekretario ti Department of National Defense (DND) Gilberto Teodoro Jr. laeng ti masurot, awan ti maipakat a ceasefire iti nagbaetan ti gobierno ken kadagiti grupo ti Communist Party of the Philippines (CPP), National People’s Army (NPA), ken National Democratic Front (NDF), ita a panawen ti Paskua.
Kinuna ni Sec. Teodoro ita nga aldaw, Disiembre 18, nga ania man a pannakaisardeng ti gubat nga iwayat ti gobierno kadagiti CPP-NDA-NDF ken panagsardeng iti panangsaranget kadagiti terorista ken kriminal.
Kas maisursurat daytoy, awan pay ti pangngedeng ni Commander-in-Chief ti AFP Presidente Marcos Jr. no ideklararna ti ceasefire kadagiti grupo ti Komunista ita a panawen ti Paskua, kas naipakannawidan kadagiti napalabas a tawen.
Idi Nobiembre 2023, nagpirma da Special Assistant to the President Secretary Antonio Ernesto Lagdameo Jr. ken Luis Jalandoni (kameng National Executive Council ti NDFP) iti tulag maipapan iti yaanamongda iti nainkalintegan ken natalna a pannakarisut ti armado a panagdadangadang, a nangbigbig a kasapulan a mapagkaykaysa dagiti Filipino a mangsaranget iti parikut iti sosioekonomiko, nakaparsuaan, ken pangta iti seguridad.
2 a komander ti MILF, nasentensiaan iti 35 counts ti homicide iti Mamasapano massacre
Imbilin pay ni Presidente Marcos ti pannakaipatungpal ti amnesty program kadagiti natda a kameng ti CPP-NPA-NDF.
Ngem kinuna ti CPP nga ita a tawen, awan ti gandatda a mangideklarar iti unilateral ceasefire gapu iti di agsarday a panangidadanes ti rehimen ni Marcos, naulpit nga operasion ti militar, ken pannakaipakat ti linteg-militar kadagiti away.
Kinuna ni Marco Valbuena, chief information officer ti CPP, a mangangay latta ti NPA iti taripnong ken babassit a panagtitipon kas panangrambak iti maika-56 a tawen ti pannakabangonda inton Dis. 26.
Awan pay sungbat ti AFP mainaig iti daytoy. (Martin Sadongdong/Manila Bulletin//Lito Hilidon/Bannawag)
