Inanamongan ti Kamara iti maikatlo ken maudi a pannakabasa ti pannakaitantan ti umuna nga eleksion ti Bangsamoro Autonomous Region in Muslim Mindanao (BARMM), manipud Mayo 12, 2025 naipan iti Mayo 11, 2026.
Iti plenario ti Kamara itay Disiembre 17, agdagup iti 198 a Diputado ti kimmanunong iti House Bill (HB) No. 11144, ket uppat laeng ti saan nga umanamong, idinto nga awan ti di nagbotos a diputado.
Ti HB No. 11144 ti nangamendar iti Section 13, Article XVI ti Republic Act (RA) No. 11054 wenno ti Bangsamoro Organic Law (BOL).
Naamendaran met laeng ti nasao a probision idi damo a maitantan ti BARMM Election idi 2022, a naipan iti 2025.
2 a komander ti MILF, nasentensiaan iti 35 counts ti homicide iti Mamasapano massacre
Ti kaudian a pannakaitantan ti BARMM Election inton 2026 ket maigapu iti pangngeddeng ti Korte Suprema (SC) idi Septiembre a mailaksid ti probinsia ti Sulu iti BARMM.
Uppat a diputado ti saan nga immanamong iti pannakaitantan ti BARMM Election, a pakairamanan da Deputy Minority Leader Mujiv Hataman (Basilan), France Castro (ACT Teacers Party-list), Arlene Brosas (Gabriela Party-list), ken Raoul Manuel (Kabataan Party-list).
Segun ken ni Hataman, ti pannakaitantan manen ti eleksion ti BARMM ket maysa a tubeng iti pannakapapigsa iti demokrasia ken institusion ti BARMM. (Dexter Barro II/Manila Bulletin//Lito Hilidon/Bannawag)
