Saan a maanamongan ni Presidente Ferdinand Marcos Jr. (PBBM) ti sumagmamano a probision ti 2025 General Appropriations Act (GAA) maipaay iti interes ti publiko, kinuna ti Malakanyang itay Mierkoles, Disiembre 18.
Maigapu daytoy iti pannakakissay ti badiet ti Department of Education (DepEd) ken ti Philippine Health Insurance Corporation (PhilHealth) nga inaprobaran ti bicameral committee conference.
Kinompirmar ni Executive Secretary Lucas Bersamin a saan a maanamongan dagiti probision ti nailian a badiet maipaay iti interes ti publiko, ken maitunos iti programa ken paglintegan.
Segun ken ni Bersamin, saan pay a pirmaan ni PBBM ti singasing a PhP6.352 a trilion a 2025 GAA inton Biernes, Dis. 20, tapno maikkan iti gundaway ti Presidente a mangrepaso iti GAA.
Impeachment complaint kontra ken ni VP Sara Duterte, addan iti Senado
Iti kallabes, inkalintegan ni PBBM ti dimmakkel a pondo ti Department of Public Works and Highways (DPWH), ngem kinunana nga masapul a maisubli ti PhP10 a bilion a naikkat iti badiet ti DepEd ta maisupiat daytoy iti panggep ti administrasionna mainaig iti Science, Technology, Engineering, ken Mathematics (STEM).
Iti laksid daytoy, kinuna ni PBBM nga ikarigatanna a mapirmaan ti 2025 GAA sakbay ti Paskua. (Argyll Cyrus Geducos/Manila Bulletin//Lito Hilidon/Bannawag)
