Nakaawiden ni Mary Jane Veloso iti Manila itay agsapa ti Mierkoles, Disiembre 18, sakbay a sumingising ti init, a para kenkuana, mabalin a simbolo ti baro a pangrugian iti biag a napno kadagiti pakasuotan.
Nagdisso ti eroplano a nagluganan ni Veloso iti Ninoy Aquino International Airport (NAIA) iti 5:40 iti parbangon, a mangipasimudaag iti baro a biag a dandani napukawna gapu iti pannakadusana koma iti ipapatay idi 2015.
Dagiti dua nga annakna a lallaki a nakaiggem iti sabong ken dagiti dadduma pay nga ay-ayatenna ti nangabrasa kenkuana iti eropuerto.
"Welcome home, Mary Jane!" ti mensahe a naisurat iti dakkel a tarpaulin nga iggemda.
Impeachment complaint kontra ken ni VP Sara Duterte, addan iti Senado
Kinuna ni Sekretario ti Department of Foreign Affairs (DFA) Enrique Manalo a ti panagsubli ni Veloso iti Filipinas manipud iti Indonesia ti dakkel a nagbanagan ti nasinged a relasion ti dua a pagilian, ken tanda ti panagtalek ken panaggayyem da.
Pimmanaw ni Veloso iti Jakarta itay 12:53 ti tengnga ti rabii kaduana da De Vega ken dagiti opisial ti National Bureau of Investigation (NBI) ken ti Bureau of Immigration (BI).
Sakbayna, pormal nga inyawat ti gobierno ti Indonesia ti legal a panangaywan ken ni Veloso iti gobierno ti Filipinas iti naangay a seremonia ti panagpirma a pinadaanan ti Filipinas.
Nagyaman ni Veloso kada Presidente Marcos ken Presidente ti Indonesia Prabowo Subianto kadagiti amin nga inaramidda tapno makaawid iti Filipinas.
Iti ababa a press conference, inyebkas ni Veloso ti tarigagayna a maikkan koma iti executive clemency - maysa a pangngeddeng nga intaklinen ti gobierno ti Indonesia iti Filipinas.
Nupay isu met ti namnama ti gobierno ti Filipinas idi adda pay ni Veloso iti Jakarta, kinuna ti Malakanyang a "nasapa pay a pattapattaen" no ania ti aramiden ti gobierno. (Joseph Pedrajas/Manila Bulletin//Lito Hilidon/Bannawag)
