Naipila iti Kamara ti maikatlo nga impeachment complaint kontra ken ni Bise Presidente Sara Duterte, ita a Huebes, Dis. 19, ket maysa kadagiti diputado a nangyendorso ti pagaammo a kaaliado ni dati a Bise Presidente Leni Robredo.
Indauluan ni Abogado Amando Ligutan ti grupo a kaaduanna a buklen dagiti padi ken abogado ti pannakaipila ti impeachment complaint iti opisina ti secretary general ti House of Representatives iti Quezon City.
Iti maysa nga interbiu, kinuna ni Ligutan a da Camarines Sur 3rd district Rep. Gabriel Bordado Jr. ken AAMBIS-OWA Party-list Rep. Lex Anthony Cris Colada dagiti endorser ti nasao a complaint.
Sagudayen dagiti pagannurotan ti impeachment, kasla maysa laeng a pedaso ti papel ti impeachment complaint no saan a yendorso ti uray maysa laeng a kameng ti Kamara. Opisial nga inawat ni Secretary General Reginald Velasco ti complaint.
2 a komander ti MILF, nasentensiaan iti 35 counts ti homicide iti Mamasapano massacre
Dati a nagserbi a bise mayor ni Bordado iti asawa ni dati a Bise Presidente Robredo a ni pimmusay a mayor ti Siudad ti Naga ken sekretario ti Department of the Interior and Local Government (DILG) Jesse Robredo.
Segun ken Ligutan, agdagup iti 12 dagiti complainant.
"Adda dagiti padi manipud iti diosesis ti Novaliches, adda dagiti padi manipud iti order ti Carmelites, adda dagiti padi manipud iti Congregation of Mission. Adda dagiti abogado manipud iti Union of People's Lawyers ti Mindanao. Adda pay ni Ma'am Pinky Tam," kinuna ni Ligutan.
"Dagiti rason ti impeachment a namkuatan dagiti complainant ket dagiti sumaganad: numero uno ti culpable violation ti Konstitusion; adda pay pakaibatayan ti panagpasukib; adda pay graft and corruption; plunder; malversation ken technical malversation. Ti kangrunaan ket betrayal of public trust," innayon ni Ligutan.
Maikatlo daytoyen nga impeachment complaint a naipila kontra ken ni BP Duterte itoy a bulan.
Naipila ti kaunaan a complaint idi Dis. 2 babaen ti grupo a buklen dagiti lider ti civil society nga indauluan ni dati a senador Leila de Lima.
Maikadua ti naipila idi Dis. 4 babaen dagiti kameng dagiti progresibo a grupo.
Saan pay a naipatulod dagiti immuna a dua a complaint iti Office of the Speaker. (Ellson Quismorio/MB)
