Makaammon ti Department of Justice (DOJ) no agipila wenno saan nga agipila iti kaso a crime against humanity maibusor ken ni dati a Presidente Rodrigo Duterte ken dadduma pay a tao.
Daytoy ti kinuna ni Presidente Ferdinand Marcos Jr. (PBBM) kalpasan nga insingasing ti Quad-Committee (quad-comm) ti Kamara a maidarum koma ni Duterte ken dagiti kakaduana a da Senador Ronald "Bato" dela Rosa ken Christopher "Bong" Go gapu iti nadara a drug war.
Nairaman iti singasing ti komite dagiti dati a hepe ti Philippine National Police (PNP) Oscar Albayalde ken Debold Sinas; retirado a police colonel Royina Garma ken Edilberto Leonardo; ken ti dati a Malacañan aide Irmina "Muking" Espino.
Segun ken ni PBBM, ammona ti singasing ti komite ket itaklinnan iti DOJ ti nainget a pannakatingiting ti kaso sakbay a maidatag ti ania man a darum. (Argyll Cyrus Geducos/Manila Bulletin//Lito Hilidon/Bannawag)
