Inaprobaran ti National Economic and Development Authority (NEDA) Board nga idadauluan ni Presidente Ferdinand Marcos Jr. (PBBM) dagiti kangrunaan a proyekto a pasayak iti Amianan a Luzon a mangipaay iti rehion iti danum ken koriente a parnuayen ti danum.
Impakaammo ti Presidential Communications Office (PCO) itay Disiembre 18 ti pannakaanamong ti pannakaipatakder iti Ilocos Norte-Ilocos Sur-Abra Irrigation Project (INISAIP) iti naangay a maika-23 a taripnong ti NEDA Board iti Malakanyang itay Disiembre 17.
Sakbay daytoy, imparang ti National Irrigation Administration (NIA) ti pannakaipatakder daytoy a proyekto.
Kinuna ni PBBM nga adda daytoyen a gandat sipud pay panagakemna a kas gobernador ti Ilocos Norte.
2 a komander ti MILF, nasentensiaan iti 35 counts ti homicide iti Mamasapano massacre
Ngem impasigurado ni Eduardo Eddie Guillen, ti NIA Administrator, nga agnumar amin a partido iti baro a disenio ti INISAIP, ta maipatakder dagiti power generating a paset daytoy kadagiti probinsia ti Abra ken Nueva Era (Ilocos Norte).
Mairaman iti INISAIP ti pannakaipatakder ti earth dam ken rockfill dam; afterbay dam iti Nueva Era; ken dagiti pagnaan ti danum nga agserbi a pasayak kadagiti sumagmamano a sistema ti NIA.
No mairingpas, manamnama a mapasayakan ti 14,672 nga ektaria ti taltalon no matutudo, ken 13,256 nga ektaria no kalgaw. Aggapu ti danum iti Palsiguan River. (Raymund Antonio/Manila Bulletin//Lito Hilidon/Bannawag)
