Kinuna da Senador Christopher “Bong” Go ken Ronald “Bato” Dela Rosa a sisasaganada a mangsango iti ania man a kaso a posible a pakaidarumanda kalpasan nga insingasing ti Quad committee ti Kamara a maipila ti kaso maibusor kadakuada, agraman ni dati a presidente Rodrigo Duterte, gapu iti crime against humanity.
Itay Disiembre 18, inruar ti Quadcomm ti partial committee report a nangisingasing iti pannakaipila ti kaso a "crime against humanity" kontra kada Duterte, Dela Rosa, ken Go.
Nairaman kadagiti naisingasing a maidarum da dati a hepe ti Philippine National Police (PNP) Oscar Albayalde, Debold Sinas; dagiti retirado a police colonel Royina Garma, Edilberto Leonardo; ken ti dati a Malacañan aide a ni Irmina "Muking" Espino.
Dinakamat ni Diputado Robert Ace Barbers (Surigao del Norte 2nd district) ti Section 6, Republic Act (RA) No.9851 wenno ti "Philippine Act on Crimes Against International Humanitarian Law, Genocide and other Crimes against Humanity."
2 a komander ti MILF, nasentensiaan iti 35 counts ti homicide iti Mamasapano massacre
Binabalaw ni Go ti pannakairaman dagiti tao nga awan pakainaiganda iti kaso, iti committee report ti Quadcomm.
Kinuna ni Dela Rosa, ti hepe ti PNP idi panawen ni Presidente Duterte, a saanen a naklaat iti report ti Quadcomm, ngem kinunana a sisasagana a mangsango iti kaso a maipila iti DOJ.
Patien dagiti dua a Senador a panggep dagiti kalabanda iti politika a dadaelen ida tapno saanda a mangabak inton panagbobotos inton Mayo, 2025. Iti kasta, saanda a makatubeng iti gandat a pannakaikkat ni Bise Presidente Sara Duterte.
Kinuna ni Dela Rosa nga agtalek iti sistema ti hustisia iti Filipinas, ken nalinteg dagiti hues iti pagilian. (Hannah L. Torregoza/Manila Bulletin//Lito Hilidon/Bannawag)
