Binabalaw ti Partido Demokratiko Pilipinas-Lakas ng Bayan (PDP-Laban) ti singasing ti Quad-committee (Quadcomm) ti Kamara a maidarum iti kaso a panaglabsing iti Republic Act 9851 wenno ti Philippine Act on Crimes Against International Humanitarian Law, Genocide, ken dadduma pay a Crimes Against Humanity ni dati a Presidente Rodrigo Duterte, da Senador Ronald dela Rosa, Christopher Lawrence Go, ken dadduma pay, gapu kadagiti mapapati a krimen a naaramid iti drug war ti naglabas nga administrasion.
Kinuna ti PDP-Laban itay Disiembre 19 a politika ken awan ti nalawag a legal ken pammaneknek a pagbatayan ti inaramid ti Quadcomm gapu ta dagiti testimonia a nakalapda kadagiti napalabas a bista ket napilpilit ta mabutengda a ma-cite for contempt.
Segun iti PDP-Laban, ti wagas ti Quadcomm ti maipadis iti panagimbestigar iti maysa pay a komite iti maipagarup a di umisu a pannakausar ti pondo ni Bise Presidente Sara Duterte, a nangiparang iti saan a nasayaat a pannakaipatungpal, nupay nasayaat ti pannakapondona, a gandat tapno madadael ni Duterte ken dagiit kakadua sakbay ti 2025 Election.
Binabalaw ti PDP-Laban ti Quadcomm iti nadardaras a pannakairuar iti singasingda, idinto a napasamak ti maudi a bista itay laeng napan a lawas. Ket daytoy ti mangipakita iti panangidumduma ti komite maibusor iti dati a presidente ken kadagiti kakaduana. (Ivy Tejano/Manila Bulletin//Lito Hilidon/Bannawag)
