Dua a komander ti Moro Islamic Liberation Front (MILF) ti nasentensiaan iti 35 a counts ti homicide gapu iti pannakatay kadagiti kameng ti Philippine National Police-Special Action Force (PNP-SAF) idi 2015 iti Mamasapano, Maguindanao, segun iti waragawag ti Department of Justice (DOJ) ita a Biernes, Dis. 20.
Kinuna ti DOJ a sinentensiaan ti Taguig City Regional Trial Court (RTC) Branch 153, iti desision a nairuar idi Dis. 16, dagiti komander ti MILF a da Abubakar Guiaman alias "Commander Refy" ken Mohammad Ali Tambako.
Segun pay iti DOJ, “imbes a Direct Assault with Murder, inyetnag ti RTC ti nababbaba a sentensia a nangkombiktar kada Guiaman ken Tambako para iti 35 a counts ti Homicide. Tunggal maysa kadakuada, nasentensiaan iti walo (8) a tawen ken maysa (1) nga aldaw a Prision Mayor kas minimum, agingga iti sangapulo ket uppat (14) a tawen, walo (8) a bulan ken maysa (1) nga aldaw a Reclusion Temporal, kas maximum para iti tunggal count."
Nakasuan dagiti komander ti MILF gapu iti pannakatay ti 44 a SAF commandos iti operasion nga inwayat ti PNP-SAF idi Enero 25, 2015 idiay Mamasapano tapno matiliw dagiti international terrorist a da Zulkifli Abdhir ken Basit Usman. (Jeffrey Damicog/MB)
