Impanawagan ni National Authority for Child Care (NACC) Undersecretary Janella Ejercito Estrada kadagiti Filipino nga ireportda dagiti grupo iti Facebook nga adda pakainaiganna iti panaglako iti maladaga online tapno masalakniban dagiti ubbing ken maitandudo ti karbenganda, agsipud ta adda pay nabati a pito nga aktibo a grupo.
Sangapulo ket innem itan kadagiti 23 nga aktibo a grupo nga aglaklako iti maladaga iti Facebook ti naiserra.
Nupay kasta, kinuna ti NACC nga adda pay pito a grupo nga aktibo iti Facebook.
"Ti kampaniatayo kontra iti online baby selling ket sangapada a responsibilidad ti tunggal Filipino. Saantayo a mabalin a palubosan lattan dagitoy a grupo nga agoperasion ken mangipaay iti plataporma para kadagiti kakasta a kriminal nga aramid,” kinuna ni Estrada iti maysa a pakaammo idi Biernes, Disiembre 20.
US Marine, nalmes iti Ilocos Norte
Manipud idi Mayo, nakaispal iti pito nga ubbing ti NACC babaen ti pannakitinnulong ti Philippine National Police Women and Children Protection Center, ti Cybercrime Investigation and Coordinating Center ti Department of Information and Communications Technology, ken ti National Bureau of Investigation Anti-Human Trafficking Division.
Ginuyugoy pay ti NACC ti publiko nga ireportda kadagiti lokal nga autoridad, pakairamanan ti PNP, Local Social Welfare and Development Offices, ken iti barangay, dagiti ilegal a panagampon.
Ti NACC, a naipasdek babaen ti Republic Act No. 11642, ti agserserbi nga autoridad para iti panagampon ken alternatibo a panangaywan iti ubing iti Filipinas.
(Ellalyn De Vera-Ruiz/ Manila Bulletin)
